Kolasib District kum 25 tlin lawmna neih a ni

Kolasib District-in kum 25 a tlin lawmna chu nimin khan Kolasib DC Office tual-ah neih niin Kolasib bialtu MLA leh Supply Minister K. Lalrinliana chuan khuallian niin a hmanpui a ni.

Kolasib Deputy Commissioners' Office bultuma Kolasib District kum 25 tlin lawmna ah hian Minister K. Lalrinliana chuan Kolasib in district dinhmun a luah theih nana pawl hrang hrang hruaitute leh mimal inpe tak takte chungah lawmthu sawiin, heng inpekna bakah khatih hunlai a sawrkar a thuneitu Chief Minister Lal Thanhawla leh Minister Zosiama Pachuau te hmalakna lawmawm a tih thu a sawi a. Kolasib chu kum 25 lai District dinhmun a luah tawh angin District dangte tan a entawntlak, hmasawnna a awm theih nana mipui inlungrualna district ni zel turin duhsakna a hlan a, Mizoram luhkapui a nih angin Mizoram hmel timawitu ni zel turin kalkhawmte a chah bawk.

He hunah hian khual zahawm Tuirial bialtu MLA K. Laldawngliana leh Serlui bialtu MLA Lalrinsanga Ralte te pawhin thu sawiin Kolasib District chu Mizoram tan a District pawimawh tak, mipui mamawh hrang hrang chawkluhna hmun leh kan ram luhkapui a nih thu te, District Headquarters mai piah lamah khawpui pawn lam a thingtlang khua thleng pha, hmasawna inkhairual a awm zel theih nan Department hrang hrang a mawh-phurhna pawimawh tak tak chelhtute inpekna leh taihmakna a pawimawh thu te an sawi bawk a. Anni bakah hian Kolasib DC lo ni tawh MS. Dawngliana MCS (Rtd.), H. Lalengmawia IAS, Commissioner, Home Department leh Zoensanga MCS (Rtd.) te pawhin thu an sawi bawk a ni.

Kolasib District kum 25 tlin lawmna ah hian Kolasib District Bawrhsap John LT. Sanga chuan kalkhawmte lawmna thu sawiin September 10, 1998-ah Kolasib District chu Deputy Commissioner (DC) in a thutchilh tan thu a sawi a. State thenawm nen ramri thui tak intawm an nih avangin inunauna tha siam tura hmalakna hrang hrang kalpui dan te tarlangin, Mizoram luhkapui pawimawh tak a nih piah lam ah Mizoram chhung leh pawn inkalpawhna changtlung zawk a awm theih nan Rel kawng leh 4-lane kawng laih leh peihfel thuai beisei a nih thu te a tarlang bawk a ni.