Deputy Chief Minister hovin ‘Youth-20 Meet on Nationalism, Patriotism & Development’ neih a ni

Sports & Youth Services Department leh MZP tangkawp buatsaihin nimin khan Aizawl Vanapa Hall-ah ‘Youth-20 Meet on Nationalism, Patriotism & Development’ neih a ni a, he hun hi Deputy Chief Minister Tawnluia chuan khuallian niin a hmanpui a ni.

Mizoram-a Y-20 puala thupui atana thlan ‘Nationalism, Patriotism & Development’ chu tha a tih thu leh thangtharte tan pawha pawimawh tak nia a hriat thu Deputy Chief Minister chuan sawiin, khawvel hmathlir leh development kawng hrang hranga nationalism leh patriotism pawimawh thu a sawi a. State dang leh ram dangah darhsarh taka rorelna hrang hrang hnuaia Zohnahthlakte an awm loh a, rorelna khat hnuaiah awm an duh avanga Hnam Movement chu lo chhuak ta a nih thu sawiin, chu hnam thinlung avanga hnam pasaltha, ram tana nunna hlu tak tak hlantu martar te pawh kan la hriat reng thu leh thangtharte pawhin ram an hmangaihna chu hre reng se a duh thu a sawi bawk.

He hunah hian khual zahawm Sports Minister Robert Romawia Royte pawhin Nationalism leh patriotism chu ram leh hnam in hma a sawn a, a lo changtlun theihna tura thil pawimawh tak a nih thu sawiin, History en let pawhin hnam a chiang, hnam anga inphuarkhawm tlat te chu an ding nghet nge nge thin tih a sawi a, India History-ah pawh British awpna atanga zalenna an neih theih nana nationalism leh patriotism pawimawh zia a lan thu a sawi bawk. Minister chuan Y-20 chungchang sawiin, sawrkar laipuia Ministry of Youth Affairs & Sports hnuaia Y-20 Secretariat bultum a ram puma thalaite puala programme buatsaih tur a tih ah Mizoram-ah chuan Nationalism, Patriotism & Development tih thupui hmanga Y-20 Meet buatsaih a nih tak thu a sawi bawk.

Nimin-a he hun hman hi MZP General Hqrs. President Lalnunmawia Pautu chuan kaihruaiin MZP Advisor L. Ramdinliana Renthlei chuan India ramin G20 Presidency kumin chhunga a chelh mekah hian economy leh kawng hrang hranga hmasawnna hna ah G-20 ram hrang hrang thalaite chu ram leh khawvel nghahfak an nih avangin an pawimawhna an hriat theih nan leh, kawng hrang hranga ram hmasawnna atan hnuk hnai tura Y-20 buatsaih a nih thu a sawi a, kumin July 14 khan a hawnna neih a nih thu a sawi bawk. Nimin-a he hun hmanna ah hian Resource Person mi pathum te atangin thupui hrang hrang hmanga thusawi ngaihthlak a ni.