SDFA Season Ending Tournament Vawiin-ah khelh tan a ni dawn

Serchhip District Football Association (SDFA) buatsaih Season Ending Tournament chu Vawiin hian khelh tan a ni dawn ta.

MNYF Serchhip bultuma khelh tur SDFA Season Ending Tournament hi Serchhip Sports Complex-ah Vawiin chawhma dar 11:30 hian a hawnna neiin khelh tan a ni dawn a, a tirah Division Screening atana hman tura ruahman ni mah se remchan zawkna avangin Tournament pang-ngai anga khelh a ni zawk dawn a, tun thla ni 28 khian Final khela zawhfel tur a ni ang.

Tun tumah hian 1st Division leh 2nd Division te tan inelna neih tur a ni dawn a, 1st Division Team 8 awm zingah Hmar Veng FC chu hremna tuar lai an nih avanga tel lovin Team dang zawng an tel kim thei dawn a, Group A-ah FC Serchhip Kawnpui, Chhekhnai FC leh AWC FC te awmin Group B-ah Vengchung FC, New Serchhip FC, Kawn Veng FC Chhiahtlang leh Chanmari FC te an awm anga, Group pakhat a awm te zel hi inhmachhawnin point hmu sang pahnih ve ve ten Semi Final an khel dawn a ni.

2nd Division-ah Team 11 an tel dawn thung a, Group 4-ah then niin Group A-ah Field Veng FC, Chanmari FC leh New Serchhip FC te an awm anga, Group B-ah Keitum FC-I, Darnam FC leh FC Serchhip Kawnpui an awm ang. Group C-ah P&E Veng FC, Chhim Veng FC leh Bungtlang Bazar FC te an awm anga, Group D-ah Bungpui FC leh Leisekawt FC te an awm bawk ang. 2nd Division-ah hian Group pakhat a awm te zel hi an inhmachhawn anga, chumi hnua Group tina point hmu sang ber theuh ten Semi Final an khel ve dawn bawk a ni.

Vawiin hian Match thum khelh tur a ni dawn a, chhun dar 12:00 ah FC Serchhip Kawnpui leh Chhekhnai FC te an inhmachhawn anga, dar 1:45-ah Vengchung FC leh New Serchhip FC te inhmachhawnin dar 3:30-ah Kawn Veng FC leh Chanmari FC te an inhmachhawn bawk anga, an vai hian 1st Division vek an ni.