SDFA buatsaihin Serchhip-ah Football Tournament tan a ni

Serchhip Football Association (SDFA) buatsaih 2022-2023 Season Ending Football Tournament chu nimin khan khelh tan a ni ta.

Rokhawlhna engemaw a awm avanga a tira ruahman anga khelh tan theih a nih loh hnuah SDFA buatsaih 2022-2023 Season Ending Football Tournament hi nimin khan Serchhip Sports Complex-ah khelh tan a ni a, nimin khan 1st Division match thum khelh niin inkhel hmasa berah Group A atangin FC Serchhip Kawnpui leh Chhekhnai FC te goal khat ve ve inpe in an inhnehtawk a, Chhekhnai FC tan Lalsangzela chuan goal khungin hun tawp dawnah Vanlalhriatpuia chuan an lamah goal a tiluh avangin FCSA in an si phurh an sut hram a ni.

Group B-ah Vengchung FC chuan New Serchhip FC chu si hnih fai-a hnehin Lalruatfela leh Jerry Laldikkima te chuan goal khat ve ve an khung a, inkhel hnuhnung berah Chanmari FC in Kawn Veng FC 5-1 in an hneh a, Chanmari FC tan Lalramtiama chuan goal hnih khungin Melvin Zomuana, LT. Mawia leh PC. Remruatfela te chuan goal khat theuh an khung a, Kawn Veng FC tan Lalhruaizela chuan goal awmchhun a khung ve bawk.

Vawiin hian 2nd Division Match hmasa ber khelh tan tur a ni ve thung dawn a, chawhma dar 10:00-ah Group A atangin Field Veng FC leh Chanmari FC inhmachhawnin dar 11:30-ah Group B-ah Keitum FC-I leh Darnam FC an inhmachhawn anga, dar 1:00-ah Group C atangin P&E FC leh Chhim Veng FC inhmachhawnin dar 2:30-ah Group D atangin Bungpui FC leh Leisekawt FC te an inhmachhawn bawk ang.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man