Serchhip District chhunga Sial vulhna hmun MJA Serchhip District in a hmunah an tlawh

MJA Serchhip District Member te chuan nimin khan Serchhip DVO Dr. R. Lalmakthanga hovin Serchhip District-a Sial vulhna hmun Sailulak khua tlawhin Sial vulhtute an kawm a, Sial an vulh dan dinhmun leh tunhnaia Chinghnia avanga harsatna an tawh te an enpui.

Sailulak khuaa Sial vulhtu pawl, Sailulak Sial Vulh Association te nen inkawmna an neih ah Serchhip DVO Dr. R. Lalmakthanga chuan Serchhip District-ah Sial vulhna khaw panga (5) a awm thu sawiin, Sial chu Mizo ranvulh zinga kan ngaihhlut leh kan rohlu a nih thu leh tun thlenga khaw hrang hrang ten an la vulh chu lawmawm a tih thu a sawi a. Tunhnaiah Sailulak khuaa Sial vulhtu ten Chinghnia avanga harsatna an tawk tih an lo hriat thu leh report te pawh sawrkar thuneitute hnenah an pek ve zel thu sawiin, sawrkar laipui thlengin he harsatna hi an hriat tawh thu a sawi a. Kan ramah Sial vulh a nih reng theihna turin theihtawp lo chhuah zel tura chahin, Chinghnia avanga Sial damlo enkawlna tur damdawi chi hrang hrang leh hnatlang an neih-a an hman turin tanpuina pawisafai a hlan nghal bawk.


Sailulak Sial Vulh Association-a Chairman Lalramthanga chuan an khua hian eizawnna atan Sial vulh an thlan tih hlawhtlinna atan June 18, 2017-ah Sial an vulh tan tih sawiin, an khuaa Sial vulh an tam lai berin 48 an awm thu leh tunah hian mi 46 in an vulh mek thu a sawi a. Kum 2020 kumtir lam thlengin harsatna tawk lova an awm laiin hemi kum kumtawp lam atangin Chinghnia avanga harsatna an tawh thu a sawi a. Department ten an Sial vulhna kawngah nasa taka an tanpui thu leh an mamawh hrang hrangte pawh an ngaihtuah sak thu sawiin, tunah hian Sial hi 300 chuang nei ah an in ngaih thu leh mimal a ngah berin 30 an nei tling lo deuh tih a sawi bawk.

Sailulak Sial Vulh Association Chairman chuan kum 2020 khan Chinghnia avang hian Sial 8 an chan nia an hriat thu leh kum 2021-ah 16 leh 2022-ah 30 chuang an chan nia an hriat thu a sawi a. Kumin hian Sial 12 ruang an hmuh tawh thu leh chin hriat loh 20 vel ala awm thu a sawi a. Chinghnia avanga Sial an chan te hi Forest Department-ah thlenin zangnadawmna pawh an pek thu an sawi a, amaherawh chu mi pakhat in Sial 3 ah chiah zangnadawmna hi an hmuh theih thu leh pakhat ah Rs. 30,000/- zel an hmuh theih thu sawiin, Sa avanga Sial chan ang ang ah zangnadawmna hi hmuh ve theih an duh thu a sawi bawk a ni.


He hunah hian MJA Serchhip District President C. Lalhminghlua pawhin Serchhip District-a Sial vulhna hmun tha tak MJA Member ten an tlawh thei chu lawmawm a tih thu sawiin, Sial vulhtu ten harsatna an tawh sutkian a nih theihna tura tangkaina an nei a nih chuan sawrkar mipui inkara thawk Media an nih angin an inhuam reng thu a sawi bawk a ni.

MJA Serchhip District Member te hian Leng khuaa Sial vulhtu pawl, Mithun Cooperative Society Ltd. hruaitute pawh kawmin an pawl Secretary F. Rohlupuia chuan tun dinhmunah an khua ah Sial vulhtu mi 24 awmin Sial 135 vel an nei mek tih an sawi a, nikum leh kum hmasa lamah Chinghnia in an Sial 60 chuang sehin sawrkar hotute hnenah harsatna te an thlen atangin Sial 20 velah zangna-dawmna an hmuh thu an sawi a. Kumin hian Chinghnia in an Sial 13 sehin 11 chu thiin pahnih erawh an enkawl dam thu a sawi bawk a, sawrkar Department lam nen thawhhona tha tak an neih thu an sawi bawk.

Serchhip DVO Dr. R. Lalmakthanga hian Se venna leh a hliam enkawlna atana an mamawh turte bungrua bakah hnatlang leh thil tula an hman turin pawisafai hlanin North Vanlaiphai Block VO Dr. MS. Dawngliana leh a thawhpui ten an tawiawm bawk a ni.

Comments

Post a Comment

Popular News (Last 30 Days)

Vawiin-ah HSSLC Exam result

LPG man bithliah thar