Zofate rorelna pakhat hnuaia awm Champion pui tum ber

MNF Sr. Vice President Tawnluia chuan Zofate rorelna pakhat hnuaia awm chu MNF in Champion pui an tum ber a nih thu a sawi.

Nimin a MNF Mizo Hnam Run Chhung Inkhawm Aizawl-a neih MNF Sr. Vice President chuan MNF leh India inremna ziah anih dawn khan Zofate rorelna pakhat hnuaia awm chu an khel ber a nih thu leh rei tak an khel ho hnuah State ramri tih danglam chungchang hi Indian Constitution Article 3-ah tarlan anih tho avangin inremna ziah a ni thei ta tih sawiin, “Zofate rorelna pakhat hnuaia awm hi MNF Constitution-ah a in ziak a. Tun thlengin India sawrkar hi kan la nawr reng a ni,” a ti.

MNF Sr. Vice President chuan, MNF chu Pathian leh kan ram tan titute an nih avangin an danglam bik tih sawiin, “Independent kan puan khan Zofate chenna hmun zawng zawng a huam vek a. Zohnahthlak tam tak ram leh hnam tan ke an penchhuak a, mi tam takin nunna hlu tak an chân nghe nghe a ni. Zofate hi pakhat kan nihzia a lang telh telh telh a. Pathian in thisena a phuarkhawmte kan ni. Hmun hrang hrangah awm rih mah ila, thinlungin kan inzawm tlat a. Rorelna pakhat hnuaia kan awm hi MNF chuan a beisei reng a, a dintirh atanga Champion pui a tum reng a ni,” a ti.

Party dang chuan Development leh thil-dang chungchang thiam tak takin an sawi mai thei tih Tawnluia chuan sawiin, “MNF erawh chuan kan thupui ber chu 'Nationalism' hi a ni a. Hei hi kan danglam bikna a ni. Kan unaute tihduhdahna leh nekchepna, tawrhna hian kan mittui a titla a. Ram leh hnam chhan tur hian tumah kan tlanchhe dawn lo tih a ti lang a. Tuma tirhluih nilo a, hmanni a khati zat kan pungkhawm thei khan hnam thila kan tanrual zia a tarlang chiang hle a ni,” a ti bawk.

MNF thuchhuah in a tarlan danin nimin a Chhung Inkhawm ah hian Harry Khiangte chu MNF-ah lawmluh a ni a, Harry Khiangte hian he hunah hian MNF Party a zawm chhan te a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man