Mizoram Finance Commissionin Governor hnenah State Finance Commission Report an thehlut

Mizoram Finance Commission pahnihna chuan nimin khan Governor Dr. Hari Babu Kam-bhampati hnenah State Finance Commission Report thehlutin Finance Department hnenah zirchian turin Governor hian a thehlut leh dawn a ni.

2nd Mizoram Finance Commission-a Chairman F. Vanlalruat leh Member Secretary Lalmalsawma te chuan Raj Bhavan-ah State Finance Commission report an buatsaih hi thehlutin State Finance Commission hian State sawrkar in Chhiah chi hrang hrang a lak atanga tualchhung sawrkar, heng Village Councils, Municipalities leh Autonomous District Councils te’n an chan tur zat bituk te, State Sawrkar sum bawm atanga tualchhung sawrkar te tanpuina grants-in-aid pek dan tur leh tualchhung sawrkar te sum dinhmun siamthatna tur chungchang te mumal taka zirchianna an neih hnuah report hi an buatsaih a, he report hian kum 2021-22 atanga 2025-26 Financial Year chhung a huam dawn a ni.

Commission hian kum khat leh thla sawm chhung zirchianna mumal tak a neih hnuah report hi Governor ah a thehlut a, State Finance Commission report hi Governor in Finance Department hnenah zirchian turin a thawn leh dawn a, he report hi State sawrkar in a lo zirchiana a pawm hnuah a bawhzui dan ‘action taken report’ chu Indian Danpui in a phut angin Legislative Assembly-ah la pharh leh tur a ni a. Nimin-a thehlut tak Report hi Bung 11-ah then niin phek 549-a chhah a ni.

15th Union Finance Commission atanga tualchhung sawrkar - Village Councils leh Municipalities te tanpuina sum ‘Local Body Grants’ lo kal thin te hi Legislative Assembly-ah March 31, 2024 hma a State Finance Commission report bawhzuina te pharh anih loh chuan dawn zui theih a ni dawn tawh lo a. State Finance Commission report hi pawm a nih hunah chuan tualchhung sawrkar te’n State sawrkar atanga kumtina an sum dawn dan tur hria in tualchhung inrelbawlna mumal zawkin an kalpui thei dawn a ni.