Serchhip-ah District Level Task Force on Ruihhlo Do thutkhawm SW&TA Minister hovin neih a ni

District Level Task Force on Ruihhlo Do chu nimin khan Social Welfare and Tribal Affairs Minister Er. Lalrinawma hovin Serchhip-ah an thukhawm a, SW&TA Minister chuan ruihhlo dona ah kan vaia kan tanrual a tul thu leh theihtawp chhuaha kan thawha, kan mawh-ah kan lak tlan a tul thu a sawi.

Serchhip DC Meeting Hall-a he thutkhawm ah hian SW&TA Minister Er. Lalrinawma chuan ruihhlo in kan ram nasa taka min run mek thu sawiin, ruihhlo dona atan hian sawrkar chuan Chief Minister kaihhruaina hnuaiah Ruihhlo Do Core Committee dinin Social Welfare and Tribal Affairs Minister kaihhruaina in Working Committee din leh a nih thu a sawi a. Ruihhlo Dona hi thuang thum (3)-a kalpui a nih thu sawiin, Supply Reduction hnuaiah damdawi rawn lut tih tlem a nih theih nan sawrkar leh tlawmngai pawl te nen hmalak a nih thu a sawi a. Demand Reduction hnuaiah hmun hrang hrangah Awareness kalpui a nih thu leh Harm Reduction hnuaiah MSACS ten ruihhlo ngai ten natna dang HIV/AIDS te an kai lohna tura hma an lak thu a sawi bawk. SW&TA Minister chuan ruihhlo avanga harsatna lo thleng chu khawtlang in kan vaia kan tuar vek tur a nih thu sawiin, hei vang hian a do hna chu tute emaw tih tur bik ah dah lovin kan vaia kan tanrual a tul thu leh theihtawp chhuaha kan thawha kan mawh ah kan lak tlan a tul thu a sawi a, tunhnaiah kan chhehvel ram leh State-ah te buaina nasa tak a awm ah ruihhlo pawh a hluar phah theih thu a sawi bawk.


He thutkhawm kaihruaitu District Bawrhsap leh District Level Task Force on Ruihhlo Do-a Chairman Nazuk Kumar chuan kumin May 24-a thutkhawm an lo neih tawha an thurel te tarlangin, Master Trainer mi 4 lo ruat tura YMA te tih an nih thu leh heng mite hi training pek an nih hnuah Awareness Campaign neih tum a nih thu a sawi a. District Education Officer (DEO) chu Awareness Campaign neihna tur School 9 lo thlang tura tih niin CMO in School hrang hranga Awareness Campaign an neih ah ruihhlo dona chungchang pawh kalpui nghal nise tih a nih thu a sawi bawk.

Ruihhlo do hna thawktu hrang hrang ten he thutkhawm ah hian an hmalakna te tarlangin, Serchhip Addl. SP Saidingliana Sailo chuan kumin chhungin Heroin No. 4 Hawng 13 (gram 150) man a nih tawh thu leh hemi kaihhnawih ah hian mi 5 man an nih tawh thu a sawi a. Serchhip District Police ten kumin a thubuai an ziahluh tawh 78 ah a tam ber chu ruihhlo kaihhnawiha rukruk thubuai a nih thu sawiin, ruihhlo thatloh zia inzir-tirna hmun hrang hrangah an neih thu te a sawi.

Serchhip-a Asst. Commissioner of Excise and Narcotics Malsawmkima chuan kumin kum chanve chhungin Heroin kg. 1.711 an man tawh thu leh thubuai 37 ziaklutin mi 47 an man thu a sawi a. Ganja pawh kg. 2.16 manin thubuai pahnih ziahluh a nih thu leh mi 2 an man thu a sawi a. July thla chhungin tum thum lai Heroin an man leh tawh thu leh a vaiin gram 458.84 a nih thu sawiin, mi 5 an man thu a sawi a. Tunhnaia Heroin No. 4 an man kal vel dan chhutin Serchhip leh Thenzawl-ah ruihhlo ngawlvei hi an tam hle nia rin theih a nih thu a sawi bawk.

Serchhip Sub-Hqrs. YMA-a President Kawlthuama chuan YMA in Sub-Hqrs. YMA Anti-Drug Squad din a ruihhlo do hna an kalpui leh tan mek thu sawiin, Zirna In hrang hranga Awareness Campaign nei turin Master Trainer tur thlan-chhuah an nih tawh thu leh heng mite hi training pek an nih veleh Awareness Campaign nei tura an inrin thu a sawi bawk a. Serchhip CMO Dr. Lalzawmi pawhin hma an lakna te a tarlang bawk a ni.

Nimin-a thutkhawm ah hian ruihhlo dona kawnga hmalak dan tur te, sawrkar in sum a ruahman bakah hmundang atanga hmuh belh theih dan tur leh Village Level-a Task Force din dan turte sawiho niin, khaw hrang hranga VDP ding Unit 18 te chu VLTF-ah hian rin nghal theih a nih thu tarlan a ni bawk.

Comments

Popular News (Last 30 Days)

Vawiin-ah HSSLC Exam result