Group Match khelh zawh a ni

Serchhip Sports Complex-a SDFA Season Ending Tournament khelh mekah nimin khan Group Stage khelh zawh niin naktuk-ah Semi Final khelh a ni ang.

Nimin-ah match li khelh tura ruahman ah inkhel hmasa ber khelh ni lovin match thum khelh a ni a, 2nd Division-ah Group C atangin Bungtlang Bazar FC in P&E Veng FC chu 3-1 in an hneh bawk a, Group C-ah hian Bungtlang hian point 6 hmuin Semi Final an lut a, P&E Veng FC leh Chhim Veng FC ten point khat ve ve hmuin an tla thung a ni.

Nimin-a 1st Division Group B inkhel ah inkhel hmasa zawkah Vengchung FC chuan Chanmari FC chu 4-1 in an hneh a, Chanmari FC hian Melvin Lalmuanzuala goal khung hmangin hma hruai hmasa mah se Vengchung FC tan Huntharnghaka leh Jerry Laldikkima te chuan goal hnih ve ve an khung a ni. An Group-a inkhel dangah New Serchhip FC in Kawn Veng FC chu 2-1 in an hneh bawk a, New Serchhip FC tan Immanuel Malsawmzuala leh C.Lalnuntluanga ten goal khat ve ve khungin Kawn Veng FC tan Lalhruaizuala goal khat a khung bawk.

Heti hian 1st Division Group B-ah hian point 7 hmutu Vengchung FC leh point 6 hmutu New Serchhip FC in Semi Final lutin point 3 hmutu Chanmari FC leh point khat hmutu Kawn Veng FC te an tla a. Group A lamah point 4 hmutu FC Serchhip Kawnpui leh point 3 hmutu AWC FC ten Semi Final lutin Chhekhnai FC in point khat hmuin an tla bawk.

He Tournament khelh mek hi Vawiin-ah chawlh tur niin naktuk ah Semi Final match 4 khelh a ni dawn a, match hmasa pahnih ah 2nd Division ten Semi Final khelin dar 10:00-ah Field Veng FC leh Keitum-I te an inhmachhawn anga, hemi hnu hian Bungtlang Bazar FC leh Bungpui FC te an inhmachhawn leh ang. Chawhnu dar 1:30 atangin 1st Division Semi Final khelh a ni anga, inkhel hmasa zawkah FC Serchhip Kawnpui leh New Serchhip FC te inhmachhawnin hemi hnu hian Vengchung FC leh AWC FC te an inhmachhawn ve leh dawn a ni.