Tualthattu raltlan damchhung tang turin hrem a ni

Myanmar atanga Mizoram-a raltlan a rawn lut leh Khawbung khuaa awm Hrangthanchea (38) chu tualthah thubuai-ah thiamloh chantir niin damchhung tang tur leh pawisa chawi tura hrem a ni.

Hrangthanchea (38) Hnahthial, Falam District Myanmar, Khawbung khuaa rawn raltlan hi kum 2022 khan khawchhak lam sumdawng Ngokhandova thattuah puh a ni a, finfiahna hrang hrang atangin Court chuan Hrangthanchea hi thubuai pahnih ah thiamloh chantirin, niminpiah khan hremna tur a puang a, tualthah thubuai ah hian rim taka hnathawk chunga damchung lung in tang tur leh Rs. 10,000 chawi turin a hrem a, a pawisa chawi tur hi a pe tla thei lo a nih chuan thla 2 dang a tan belh leh dawn a, hei bakah hian finfiahna tibo tura ruang a thuhruk avangin kum 3 Lung In tang tur leh Rs. 5,000 chawi turin a hrem bawk a, a pawisa chawi tur hi a pe thei lo a nih chuan thla 2 dang a tan belh leh dawn bawk a ni.

Hrangthanchea hian kum 2022 khan sumdawng Ngokhandova, Langzang (Myanmar) hnen atangin Thingzaina khawl Rs. 35,000/-in a lei a, Rs. 20,000 pein a bak zawng a bat sak a, August ni 13, 2022 khan Ngokhandova hi leiba thing turin Hrangthanchea In-ah hian a kal a, a inring lo lai chu Hrangthanchea hian Tuboh-in vawi engemaw zat chhu a, a thih thlengin a nghawng-ah a rap bet zui bawk a; a thah hnu hian a ruang chu tukverh-ah thehchhuakin a thlang tuikawr-ah a thukru zui a, a thiltih dan hi hmu rutu an awma a hriat avangin a tuk Aug. 14, 2022-ah Khawbung khawtlang hruaitute hnenah a inpe a, Dungtlang Police-te chuan an man zui ta a ni.

Comments

Popular News (Last 30 Days)

LPG man bithliah thar