MNYF in lawmawm an ti

MNF Thalai Mizo National Youth Front (MNYF) chuan Mizoram sawrkar leh tlawm-ngai pawl hrang hrangten kum 24 chhung an buaipui tawh,

   Tripur-a Tuikuk (Bru) awmte Mizoram Electoral Roll atanga paih fel an ni ta chu lawmawm an tih thu an sawi. Inrinni-a Aizawl Press Club-a chanchinbumite an kawmnah MNF Thalai Vice President Zodinpuia chuan Tripura-a chhuk Tuikuk (Bru)-te avang hian Mizoram sawrkar mai bakah tlawmngai pawl leh Mizo mipuiten harsatna tam tak kan lo tawh phah tawh tih sawiin, “January 16, 2020 khan Chief Minister Zoramthanga hmalakna leh tlawmngai pawlte tanrualna avangin Tuikuk (Bru)-te chu Union Home Minister Amit Shah kaihhruaina hnuaiah mi 30,000 chuang zet Tripura-a awm nghet turin New Delhi-ah inremna ziahpui an ni a. He hmalakna kal zelah hian Mizoram Electoral Roll-a chuang Tuikuk (Bru)-te paih tur hian Chief Minister kaihhruaina hnuaiah Mizoram sawrkarin hma a la a, Electoral Roll-a awm thin Tuikuk-te Mamit District chhung atangin voter 9,130, Kolasib District atangin voter 1,979 leh Lunglei District atangin voter 888, a vaiin voter 11,997 zet chu paih fel an lo ni ta a ni,” a ti.

  Zodinpuia chuan kum 24 chhung teh meuh Mizoram in harsatna kan tawh chin fel a nih theihna tura Chief Minister Zoramthanga leh a kaihhruai MNF sawrkar hmalakna te, Mizo-ram himna tura beidawng loa theihtawp chhuah rengtu NGO Co-ordination Committee hma-lakna zawng zawngte chu MNF Thalaite chuan an chhuang takzet tih an sawi bawk a ni.

Tarlan tawh angin Mizoram mi Tripura a chhuak te hi hun rei tak Mizoram Electoral Roll ah awmin inthlanpui ah pawh a hranin Vote an thlak theihna tur ruahman thin a ni a. Amaherawh chu inremna ziah a nih hnuah heng mite hi Tripura-ah inbengbel tura tih an ni tawh a ni.