Hamthatna awm thei hrang hrangah SHG member te leh an chhungte duhsak thin an ni - RD Minister

Rural Development Minister Lalruatkima chuan Mizoram Sawrkarin Self-Help Group (SHG) te a ngai pawimawh hle tih sawiin, hamthatna awm thei hrang hrangah SHG member te leh an chhungte duhsak thin an nih thu a sawi.

Thingsulthliah RD Block-a Block Level Credit Camp hmasa ber nimin-a ETC, SIRD Complex, Thingsulthliah-a neih a hmanpuina ah RD Minister chuan Mizoram Sawrkarin thingtlang a chengte eizawnna leh intunnunna tur a ngaipawimawh hle tih sawiin, Mizoram sawrkar chuan chhungkaw inrelbawlna leh eizawnna kawnga nu pawimawhna a hria a, hemi kawngah hian chak taka hmalak mek zel a ni tih a sawi a. Nu ho tana siam Scheme tha tak National Rural Livelihood Mission, Self Help Group kaltlanga miretheite chawikanna tur programme chu MzSRLM kaltlangin chak taka hmalak mek a nih thu leh tangkai taka lo hmang zel turin SHG member kalkhawmte a chah a ni.

RD Minister chuan Mizoram Sawrkarin SHG te a ngai pawimawh hle tih sawiin, hamthatna awm thei hrang hrangah SHG member te leh an chhungte duhsak thin an nih thu a sawi a. “Mizo nute hian theihna sang tak in nei a, Mizo Kristian chhungkua khaiding tur leh enkawl tur hian in rintlak tawk a ni,” tiin Self Help Group hmasawnna chu chhungkua, khua leh rampum hmasawnna a ni tih hi hre thara mahni hmazawn theuh a theihtawp chhuah turin SHG member leh VO hruaitute a chah bawk a ni.

Nimin-a he hun hmanna ah hian Mizoram State Rural Livelihood Mission (MzSRLM)-a CEO H. Lalchhandami chu khual zahawm niin Mizorama SHG te an chhuanawm a tih thu leh India rama SHG zingah Mizoram-a SHG te chu loan chhia (Non-Performing Asset) nei tlem ber an ni tih a sawi a. Tan an lakna leh an thahnemngaihna avanga hmingtha an nihna chu thaichhe lo tura theihtawp chhuah zel tura chahin, insurance lak ngai pawimawh turin a chah bawk.

Thingsulthliah RD Block tana Block Level Credit Camp hmasa ber-ah hian Thingsulthliah RD Block hnuaia Self Help Group (SHG) 21 te hnenah cheng nuai 46,50,000 hu loan sanction letter semchhuah a ni a, Mizoram Rural Bank (MRB) Branch 4 -Tlungvel Branch, Thingsulthliah Branch, Sesawng Branch leh Seling Branch te MzSRLM hian dawrina, anni hnen atang hian SHG te loan pekchhuah a ni a. Hei bakah hian Sesawng Village Organisation-I (VO-I) te hnenah puanthuina khawl (Wonder Stitch automatic sewing machine) 6 semchhuah a ni bawk. Thingsulthliah RD Block-ah hian MzSRLM hnuaiah khaw 7 awmin SHG 267-ah member 1777 an awm a ni.

Comments

Popular News (Last 30 Days)

LPG man bithliah thar