CM in Zirlai lawmna leh chawimawina hun a hmanpui

Chief Minister Zoramthanga chuan, “Duhthlanna dik leh chu duhthlanna hlen tura tumruhna neih tlat hi hnehtu nihna a ni,” a ti.

Govt. Hrangbana College in nimin-a Hrangbana College zirlai tharte lawmna leh zirlai tithate chawimawina (Freshers' Social & Felicitation) hun an College Golden Hall-a an buatsaih a hmanpuina ah Chief Minister chuan Vawiin-a zirlai naupang duhawm tak takte hian an nun bul an tan mek chauh tih sawiin, hmabak thui tak an la nei tih a sawi a. “Kan hma lamah hian malsawmna dawn theihna leh anchhia dawn theihna kawng a awm ve ve a, zu leh ruihhlo laka kan fihlim lo a nih ngat chuan anchhia; mimal, chhungkua leh khawtlang tana pawi leh thalo em em kawngah kan lut dawn tihna a ni,” tiin “Kawng dik leh tha, malsawmna kawng in zawh theih nan Zu leh ruihhlo lam chi, thil tha lo tinrengte hnehtu thalaite lo ni tlat ang che u,” a ti bawk.

He hunah hian tunhnaia University Exam-a titha zirlaite hnenah lawmpuina chi hrang hrang hlan niin Hrangbana College zirlai naupang University Exam-a a pumpuia titha ber lawmman, R. Zatlaia Award chu Lalhriatpuia Ralte, Department of Commerce hnenah hlan a ni a, University Rank Holders (Top ten tling chin) zirlai naupang 22 te hnenah Hrangbana Awards hlan niin Dr. Suprakash Maiti Award chu Lalremsiami, Department of Commerce hnenah hlan a ni a, Merit Awards zirlai naupang 10 te hnena hlan an nih bakah Department Awards chu naupang End Semester Exam-a 'O' Level hmu chinte hnenah hlan an ni a, Alumni Awards chu Subject Topper pahnihte hnenah Alumni Association ten an hlan bawk a ni.