MSU in Zirlai tithate lawmpuina hun an buatsaih

Mizo Students’ Union (MSU) buatsaihin Under Graduate 2023 result chhuaka Mizo Toppers te lawmpuina hun nimin khan buatsaih niin Deputy Chief Minister Tawnluia chuan he hun hi a hmanpui a ni.

Aizawl Vanapa Hall-a zirlai tithate lawmpuina hunah hian Deputy Chief Minister Tawnluia chuan zirlai kalkhawmte chu Pathian leh kan ram leh hnam tan an thiamna te, theihna te chhuah zel turin a chah a. Kan ram leh hnam Pathian in min pek hi min nek chep a, min rap bettu te laka vawng him turin leh kan hnam chhan chu tu dang kut ni lova thalaite kutah a innghah thu a sawi bawk. Deputy Chief Minister chuan thalaite chu kan ram, kan hnam vawn nunna turin Nationalist Spirit kan inzirtir a, kan thinlungah Hnam nationalist rilru kan in tuh thar angaih thu leh khawi hmunah pawh awm mah ila Mizo nihna vawngnung a chawinung zel turin a chah bawk.

He hunah hian khual zahawm Transport Minister TJ. Lalnuntluanga pawhin he huna kalkhawm zirlaite chu hun lokal zel tura ram hruaitu tur te an nih thu sawiin, midangte tan malsawmna nih tum tlat turin a chah a. Tunlai khawvelah Social Media hman uar a nih thu sawiin, thalaite chu fimkhur taka hmang turin a fuih bawk. Minister chuan sawrkar hnathawk ten an thawh chhan an chian a ngaih thu pawh sawiin, “Kan rilru siam tharin mitin tana banphak Officer, sawrkar hnathawk ni turin rilru kan siam thar angai a, he kan ram zimte ah hian in en hrang tham kan la awm lo a, chuvangin induhsak tawnzel turin ka chah duh che u a ni,” a ti bawk.

MSU Vice President Laldinsanga kaihhruai he hunah hian MSU President Samuel Zoramthanpuia chuan tunhnaia Manipur ramchhunga Zofate tawrhna rapthlak tak avangin Mizo thalaite thinlung chu a na takzet tih sawiin, Mizoram chhunga Meitei awmte chu an sahimna tura Manipur ram-a let vek turin a chah bawk.

He hunah hian Under Graduate Examination 2023 Mizo Toppers mi 26 te hnenah lawmpuina an hlan a, an zinga mi 15 te chu Pachhunga University College-a zirlai niin Govt. Zirtiri Residential Science College atangin mi 4, Govt. Hrangbana College atangin mi 2 leh Faith College, Govt. Aizawl College, Lunglei Govt. College, St. Xavier's College leh Govt. J. Buana College atangin pakhat theuh an ni a. College Students’ Union Leaders 2021-22 Graduate tharte lawmpuina hun hman nghal a nih bakah Mizo Folk Song, Hnam lam leh rimawi hmanga Zofate khawvel hmun hrang hrang hmuha phochhuaktu KC. Runremsangi hnenah MSU Award 2023 hlan a ni a. MSU chhungkua atanga MCAB Board of Director atana thlan thar Lalrempuia leh Tlungvel MSU Sub-Hqrs. Vice President Malsawmdawngzela chu In kang atanga mihring nunna a chhanchhuah avangin chawimawina thilpek an hlan bawk.