DIPRO thar in MJA te leng ah sawmin an inkawm

Serchhip District Information & Public Relations Officer (DIPRO) thar Lalnunmawii MIS chuan MJA Serchhip District Member te a Pisa a leng-ah sawmin nimin khan inkawmna an nei.
I&PR Department-a Deputy Director Lalnunmawii chuan Serchhip DIPRO hna chelh tura tih a nih hnuah MJA Serchhip District ten an lo dawn-sawnna chu lawmawm a tih thu sawiin, Serchhip District MJA ten Serchhip-a DIPRO lo awm tawh te tha taka an lo thawhpui thin angin thawhhona tha tak an neih a beisei thu a sawi a, Serchhip District tan theihtawp chhuah a tum thu sawiin, chumi atan chuan Journalist te thlawpna pawh a mamawh dawn tih a sawi a. An Department hmalakna hnuaiah Photography, Arts leh Film lam te pawh awm bawk mah se Journalist te chu an hmalakna hrang hrang puangzartu ber an nih avangin an mamawh thu a sawi a. Mipuite leh sawrkar tana rawng an bawlna chu a pawimawh zia hriaa a tul apiangah inpeizawn-a thawkho turin a sawm bawk a ni.

MJA Serchhip District President C. Lalhminghlua chuan Serchhip DIPRO thar chu thinlung taka an lo lawm thu sawiin, a lakah pawh beiseina sang tak an neih thu a sawi a. Thawh-hona tha tak an neih an beisei thu sawiin, I&PR Department in an mamawhna apiangah MJA te chu an inhawn reng thu a sawi bawk.

He inkawmna ah hian MJA Serchhip District General Secretary Zonunsanga Kawlni chuan MJA Serchhip indin dan leh MJA dinhmun tlangpui a tarlang a, MJA Member ten DIPRO thar lawmna thu te an sawi bakah thawhhona tha an neih theihna tur kawng pawimawh nia an hriat te an sawi bawk a ni.

MJA Serchhip District-ah hian tun din-hmunah member 14 awm mekin an zinga mi 11 te hi Serchhip-a awm niin midang 3 te hi Then-zawl-a awm an ni a, Print Media-a thawk mi 11 awmin Electronic Media-a thawk mi 3 awmin Chanchinbu 10-a thawk an ni.