Ni 2 awh tur Zoawi Kut 2023 hman tan a ni

North Eastern Council (NEC) bultuma Art & Culture Department leh MZI Gen. Hqrs. tangkawp buatsaih ‘Zoawi Kut 2023’ chu nimin khan Dawrpui Multipurpose Hall-ah Art & Culture Minister R. Lalzirliana chuan a hawng.

Ni 2 awh tur Zoawi Kut 2023-ah hian ‘Unity through Music’ (rimawi kaltlanga inpumkhatna) tih thu thupui-ah hman niin Art & Culture Minister R. Lalzirliana chuan ‘inpumkhatna’ thupui hmanga a vawikhat nan Zoawi Kut buatsaih chuan rimawi leh lam hmanga India hmarchhak State a chengte a hnuhhnaih ngei a beisei thu sawiin, ‘Culture’ hi ram leh a chhunga chengte min chawimawitu, khawvel hmuha min pholangtu leh hnam anga min phuarkhawmtu a ni, a ti a. Mizoram thenawm Myanmar leh Manipur a buaina thleng te en in, inpumkhat a tul zia a tarlang nia a hriat thu leh, remna leh muanna a thlen thuai a beisei thu a sawi bawk.

He hunah hian Chief Secretary Dr. Renu Sharma pawhin Kut thupui chu tunlai a kan hun tawn nena inhmeh tak a nih thu sawiin, tun darkar a kan mamawh langsar ber a ni, a ti a. Mimal leh hnam anga kan nun-a rimawi in hun pawimawh tak a chan dan te, mi phuarkhawtu a nih dan te sawiin, hnam hrang leh tawng hrang hmangte pawh rimawi hmangin kan inpumkhat thei a ni, a ti a. Inpumkhatna chu kan danglamna, kan inhriatthiamlohnate sukiang a, inhriatthiamna te, inkhawngaihtawnna te leh inrintawnna te nei tura a pawimawh thu a sawi bawk.

Zoawi Kut ni khatna ah hian Mizoram bakah Tripura, Meghalaya, Assam, Nagaland leh Arunachal Pradesh atangin zaithiam hrang hrang leh Cultural Troupe te telin zai leh lam ngaihthlak a thlirho a ni a. Zoawi Kut ni hnihna hi Vawiin, July ni 28, 2023 chawhnu dar 2:00 atanga hman tan leh tur a ni ang.