Mizoram-a Meitei zingah vau tawk la hre lo

Mizoram Director General of Police (DGP) Anil Shukla IPS chuan Mizoram-ah Meitei vau tawh an la hriat loh thu sawiin, tunhnaia Meitei haw te chu an hlauh avanga haw an nih thu a sawi.

Mizoram DGP hian nimin khan a Offfice-ah Chanchibu mi thenkhat te kawmin tunhnaia Manipur-a buaina thleng leh a kaihhnawih a sawipui a, DGP chuan Vawiin a NGO Coordination Committee huaihawta Manipur-a Zo hnahthlakte thlavang hauhna kawngzawh neih tur chu muanawm taka neih a nih a beisei thu leh Police lamin venhimna lam tha taka kenkawh an tum thu a sawi a. Mizoram-a Meitei awm zingah Manipur-a haw duhte a tul angin venhimna an pe tih sawiin, Mizoram-a Meitei te zingah vau tawk an awm a hriat loh thu leh thenkhat erawh an hlauh avanga haw an awm tih a sawi a. Meitei chungchangah hian Assam leh Manipur DGP te nen an inbiakpawh reng thu a sawi bawk.

DGP chuan ruihhlo do kawngah Mizoram Police ten theihtawp chhuah chhunzawm zel an tum tih pawh sawiin, tunhnaia drugs tawlhruk a tam chhan chu Manipur buai kaihhnawih a ni thei tih a sawi a, Mizoram Police ten drugs an man te chu hmundanga hman tur nia a hriat thu a sawi.

Mizoram DGP thar Anil Shukla hi kum 1970-a New Delhi-a piang niin kum 1996 khan Indian Police Service (IPS) a zawm a, AGMUT Cadre-ah dah niin tunhnai khan Mizoram DGP hna chelh tura ruat a ni a, nimin-a an inkawmna ah hian thuthar thehdarhtute nen thawhhona tha tak neih a duh thu a sawi bawk.