Lenkawl

Serchhip khawpui chhunga Vawksa zuartu mi thenkhat ten vawksa kg. khat man Rs. 450/- a an tihsan hnuah December 13, 2025 hma zawng chuan Rs. 400/- a hralh tura tih a ni a, December 13 atang chuan Rs. 450/- ah tihsan a ni ang.

Serchhip Leisekawt Mual-a neih ‘Serchhip South Zone Middle School Sports 2025’ chu nimin khan zawhfel a ni ta a, Goodwill English Academy chuan point 129 hmuin an Champion a, point 104 hmutu Chawngbuangi Memorial School chu pahnihna niin Govt. Hriangtlang M/S in point 87 hmuin pathumna an ni bawk. Mimal-ah C. Lalrempuia (GEA) chuan point 25 hmuin ‘Best Boy’ a ni a, Rosangpuii (GEA) in point 16 hmuin ‘Best Girl’ a ni bawk.

Thla thar December 1 atang khian Serchhip khawpui chhungah khauh taka lirthei endik hna thawh a ni dawn.

District Level Monitoring Committee (DLMC) on Implementation of PMEGP, Serchhip District chu nimin khan an Chairman leh Bawrhsap Paul L. Khuma hovin Serchhip DC Meeting Hall ah an thukhawm a, he hunah hian kum 2025-2026 sawrkar kum chhunga PMEGP loan diltute dinhmun sawiho niin he loan diltu, Bank in an lo hnawl te chu hnawl an nih chhan a mal te te in Bank ten an sawifiah a. Loan dil mek (under process) te thlen chin sawiho a ni bawk a. Loan latute zinga Unit zuzi ralta te chungchang pawh sawiho a nih bakah Loan lak fimkhur a ngaih zia te, chutih rualin a dik taka hmangtu leh a tak taka hmalatute tana PMEGP Scheme tangkaizia te sawiho a ni bawk.

Serchhip District Beautification Project kalpui meka hnathawh zawh tawh thenkhat chu nimin khan VC te hnenah enkawl zui tura hlan a ni.

Thenzawl Zone Football Association (TZFA) buatsaih ‘Lothazawl Diak Thlahna Inkhelhpui’ chu nimin khan zawhfel niin he hun hi Rural Development Minister Prof. Lalnilawma chuan a telpui a ni.

Science Teachers Association Mizoram leh Samagra Shiksha Mizoram te buatsaih ni hnih awh State Level Children's Science Congress vawi 33-na chu nimin khan zawhfel a ni a, Junior leh Senior Category-a Project lut 47 atangin a tha zual 10 thlanchhuah ah Rachel  T. Liansangpuii (Marian H/S, Serchhip) chu Senior category-ah a tel a ni.

Karleh Nilaini-a Lai Autonomous District Council (LADC) Inthlanpui vawi 12-na neih tur atana inbuatsaihna chuan a vawrtawp a thleng mek a, Inthlanna buaipuitu tur Presiding Officers, First Polling Officers leh Second Polling Officers-te tana Training hnuhnung ber chu nimin khan neih niin nimin vek khan Postal Ballot hmangin Vote an thlak nghal a ni. He Inthlanna neih tur atan hian Political Party leh Candidate te pawhin ngawrh takin Campaign an nei mek bawk a ni.

Kumin-a Krismas leh Kumthar vuakvet lo thleng tur chungchang thlirin nimin khan Champhai District Bawrhsap Mohammad Aaquib-a kaihhruaiin Dan leh thupek kengkawhtute bakah a kaihhnawih sawrkar pisa aiawhte; khawpui chhung Village Council, Sub-Hqrs YMA, MJA leh Champhai District Dawrkai Association aiawh te an thukhawm a, Hunpui lo thleng tura mipuite an him zawk nan khauh zawka lirthei vei vak te enkawl an nih tur thu te, halpuah leh halmawi khapna thupek bakah zu leh ruihhlo khapna te khauh zawka kenkawh a nih tur thu te tarlan a ni.

Sumsuih khua 'Ranhuâng' ram a kawlphetha MW 5 pechhuak thei tur Solar Power Plant dahna tur hmun chu niminpiah khan Power & Electricity Minister F. Rodingliana chuan a tlawh a, P&E Department in ruahmanna an siam dan chuan Ranhuang Solar Power Plant atanga Power siamchhuah hi 33KV line Sialsuk Sub-Station ah dah lutin heta tang hian mipui hnenah pek chhuah leh a ni dawn a, P&E Minister chuan he hna thawk tur hian ZEDA chuan Contractor an thlan fel tawh thu sawiin, P&E Department lamin a ban phun leh hna dang engemaw chen an thawh tawh thu a sawi a, mpui ten a hun taka an chhawr ngei theih nan thawktute chu inthlahdah lo turin a chah a ni. Power Minister hian 33KV Sialsuk Sub-Station leh 132 KV Melriat Sub-Station te pawh a tlawh nghal bawk.

Nimin khan Directorate of Ayush leh Mizoram Upa Pawl (MUP) tangkawp buatsaihin Aizawl Vaivakawn Cultural Centre cum Auditorium-ah Upate tana Hriselna Kut buatsaih a ni a, he hunah hian upate tana hriselna tihthat nan leh vawnhim nana thil pawimawh inzirtirna leh Upa ten natna chi hrang hrang an neihte leh inenkawl dan te zirho a ni a. Hun hman zawhah a thlawna inentirna buatsaih ni nghal bawkin a mamawh te hnenah damdawi sem nghal a ni. He hunah hian Aizawl West Area chhunga MUP Branch 17 atangin Member te an tel a ni.

State Hub for Empowerment of Women (SHEW), Directorate of Women & Child Development chuan ‘Domestic Violence Week 2025’ denchhenin nimin khan Aizawl-a Assembly House Annex Conference Hall-ah hmeichhiate chunga hleilenna thleng thin chungchang inzirtirna hun chu ‘Empowering Women - Last Mile Delivery of Service’ tih thupui hmangin an buatsaih a, he hunah hian December 10 thlenga hman tur ‘16-Day Campaign on Ending Gender-Based Violence’ pawh hawn nghal niin Hmeichhe pawl hrang hrang leh sawmbik te an tel a ni.

School Education Minister Dr. Vanlalthlana chuan Mizoram-ah Catholic Kohhran in zirna kaltlangin danglamna nasa tak a thlen tih sawiin, Education an kalpui dan pawh sawrkar thlengin kan entawn niin a sawi.

FCS&CA Department-a thawktu pawl lian ber Mizoram Supply Executive Association (MSEA) chuan nimin khan General Conference vawi 15-na hmangin Supply Minister B. Lalchhanzova chuan a hmanpui a, MSSRP Scheme hnuaiah Ration Card tihpun tum a nih thu a sawi bawk.

Art and Culture Minister C. Lalsawivunga chuan Hnam upa leh fing apiangin mahni hnam tihphung leh kalhmang vawngin an roh thin tih sawiin, “Keini Mizote pawhin kan hnam zia hi kan rohin kan chhawmnung zel tur a ni,” a ti.

Aizawl-a Assam Rifles ram chhuahsan hman dan tur reltu Advisory Committee thutlukna siam danah an ngaih a that loh avangin CESJ chuan Committee Invitee an nihna atangin an inhnukdawk tih an sawi.

Mizoram sawrkar chuan kuthnathawktute Sawhthing thar a leina man a pe kim tawh tih sawiin, ZPM Party chuan sawrkar in a lo intiam tawh ang ngeia Sawhthing a lei thu an sawi bawk.

Mizoram Larsap General (Dr) Vijay Kumar Singh chuan Mizoram in hmalam hun eng tak a nei tih a sawi.

Mizoram Volleyball Association (MVA) buatsaih Inter-District Volleyball Championship 2025-ah nikum lama Champion Serchhip District Mipa Team te chuan nizan a Semi Final khelh ah a thlengtu Lunglei District chu 3-1 a hneh lovin Final an thleng zo lovin an tla.

Serchhip District Consumers’ Association (SDCA) chuan mahni thil chah ni lo khul thu ah mipuite fimkhur turin an chah.

Kumin-a Mizoram-a Thingtam chu khaw 180 ten tuarin District hrang hrang zingah Mamit District chu a tuar nasa ber an ni a, Serchhip District-ah pawh khaw 23-a chhungkaw 552 ten Thingtam hi tuarin tunah chuan Sazu puang pawhin ziaawm lam a pan tawh nia hriat a ni.

September 2025 thla tawp Quarter thlenga Serchhip District chhunga Bank hrang hrangte hmalakna leh hnathawh thilirletna chu nimin khan Serchhip DC Meeting Hall-ah neih a ni.

PHE Department in Serchhip khawpui chawmna atana Tuikum lui atanga Tui an pump-na Electric khawl-a ‘Soft Starter’ chhia thlakna tur chu nimin khan Aizawl rawn thlenpui a ni a, Serchhip-ah rawn lak nghal tura ruahman niin harsatna dang a awm loh chuan naktuk (Inrinni) khian khawl bun hna hi thawh tan theih beisei a ni.

Nimin khan Kolasib-ah SCERT Education and Vocational Guidance and Counselling Cell buatsaihin ‘District Level Career Exhibition’ neih a ni a, he hun hi Bawrhsap Robert C. Lalhmangaiha chuan telpuiin zirlaite chu an tumah chiang turin a chah a, “In nun la hmang chho tur in ni a, tumruhna nen in hun in hman a ngai a. Chhungkua din a, hlawhtlinna nei turin tumruhna leh tihtakzetna a ngai a ni,” a ti bawk. He Exhibition-ah hian High School 10 an tel a, Category 4-ah inelna hi neih niin a tithate hnenah lawmman sem nghal a ni bawk.

Mizoram University-a Department of History & Ethnography buatsaihin ni hnih (2) awh tur North East India-a hnamze hrang hrang ten an nunzia inzirtir dan zirhona chu tun thla ni 24 leh 25 khan neih a ni. Indian Council of Historical Research (ICHR) bultum he Seminar hi Mizoram University-a Dean’s Seminar Hall, School of Social Studies-ah neih a ni a, Hmakhawsang atang tawh a Tribal leh hnam te zawk te nundan leh nun-phung bakah hnamzia an lo inzirtir dan phochhuaha chipchiar zawka zir chu he Seminar tum ber a ni a, tunlai zirna kalphung leh zirna In ah te chawiluh chu a tum a ni.

South Tuipui Bialtu MLA Jeje Lalpekhlua chuan nimin khan a Bial chhunga khaw hrang hrang- South Lungleng, Muallianpui, Lungpui-tlang, New Kawnpui, South Vanlaiphai, Darzo leh Tuipui South te tlawhin khaw hrang hrangte mamawh chu a hriatpui thu leh a hlawhtlin theih nan Aizawl lamah theihtawp chhuaha a bawhzui thu a sawi a. Sawrkar chuan flagship programme, a bikin kuthnathawktute Sawhthing hralhna Support Price pek chu an intiamna ang ngeiin a kum khatna ah tih hlawhtlin nghal a nih thu pawh sawiin, Health Care Scheme tha tak kalpui a ni ta te leh ruang phurhna sawrkar in a tum te chu a hlu tak zet tih a sawi bawk.

Press Information Bureau (PIB) Kochi buat-saih-a zin chanchinbumite chuan India hmarchhak State zingah Mizoram an fang mek a, heng Chanchinbu mite hian Thawhlehni khan Rel hmanga Sairang rawn thlengin Sairang Rel Station-a Station Master Guddu Singh chuan a lo dawngsawng a. He Rel chawlhhmun pawimawh zia, State dangte nena intlawhpawhna awlsam leh rang zawk atana a tangkai dan bakah Mizoram ei leh bar lama hmasawnna a thlen theih dante a lo hrilhfiah a ni. Aizawl-a an cham chhungin Museum an tlawh a, Mizo hnam ziarang leh nunphung hausa tak chanchin an zir chu hlawk an intih thu sawiin, Thenzawl khua pawh thawh an tum thu an sawi a ni.

Kolasib District chhunga Bank hrang hrang te hmalak dan thlirletin Kolasib District Consultative Committee (DCC) leh District Level Review Committee (DLRC) chu niminpiah khan an thukhawm a, he hunah hian kumin September thla tawp quarter thlenga Bank te hmalak dan thlirletin Credit Deposit ratio chu 61.74 a ni a, quarter hmasa aiin a sang hret a, Financial Year chhungin District Credit Plan hlawkna chu 23.19% a ni. Hnahthial-ah pawh nimin khan an District chhunga Bank hrang hrangte hmalak dan thlirletna hun hi hman a ni bawk a, tanlak an ngaihna lai te pawh sawiho a ni bawk.

Karleh Nilaini-a Lai Autonomous District Council (LADC) Inthlanpui neih tur atana hman tur EVM leh VVPAT te khawl hmanga thliarna chu a thawh hnihna atan nimin khan Lawngtlai DC Conference Hall-ah neih a ni a, he hunah hian EVM leh VVPAT hman tur leh Reserve-a awm turte thlairfel a nih bakah an hmanna tur Polling Station thliar fel a ni a, hemi hnu hian heng Vote thlakna khawl te hi hman theih tura buatsaih zui niin Candidate te leh an chhinchhiahna te pawh dahfel theih a ni tawh a ni.

Nimin khan Siaha-ah District Agriculture Marketing Committee (DAMC) chu an Chairman leh Bawrhsap VL. Hruaizela Khiangte hova thukhawmin Mizoram sawrkarin kumthar 2026 February atangin Sawhthing lei tuma a inbuatsaih thu tarlan a ni. Kumin (2025) January atanga July thla chhung khan an District chhunga SCC pahnih, Siaha leh Tipa-ah Sawhthing qtls 2774.09 lei niin Rs. 1,38,70,450 sen a nih thu leh Sawhthing hralhna atangin Rs. 32,13,799 hmuh let a nih thu tarlan a ni a. Sawhthing hralh tam ber Lalpekliana, Siahatla-II chuan qtls 235.58 hralhin Lalrammawii, New Siaha West-I in qtls 135.15 leh Vabeichhuakhu, Zyhno B in qtls 118.93 a hralh thu tarlan a ni bawk.

School Education Minister Dr. Vanlalthlana chuan zirlaite chu lehkhabu chhiar tam turin a fuih.

The Mizoram Ancient Monuments and Archaeological Sites & Remains Act 2001 tlawhchhanin Mizoram-a pi pu hmun hlui 81 chu State Protected Monument-ah puan a ni tawh.

Mizoram Pollution Control Board (MPCB) chhinchhiah danin, kumin October thla chhunga lirthei khu endik zat chu a vaiin 8,354 a tling. MPCB-a thawktuten Akashvani News Aizawl an hrilh danin, lirthei khu endik 8,354 zinga 77-te chuan endikna an paltlang zo lova, lirthei khu endik zingah hian Two Wheeler tam berin 5,883 endik a ni. Kum 2024- 2025 sawrkar sawrkar kum chhungin Mizoram pumah lirthei 72,097 endik a lo ni tawh a, heng zingah hian lirthei 1,078 te chuan endikna an paltlang zo lo bawk. 

Champhai High School Golden Jubilee lawmna chu nimin khan neih chhunzawm leh niin Champhai North Bialtu MLA Er. H. Ginzalala chuan a hmanpui a ni.

Hursualna lam hawia naupang kum tlinglo khawihtu Kolasib-a cheng Vanlalruata (67) chu kum 10 chhung lung In tang tur leh Rs. 7000/- chawi tura a chungthu rel a ni.

State Level Children's Science Congress vawi 33-na chu nimin khan Aizawl-a Directorate of School Education Conference Hall-ah neih tan a ni a, vawiin hian chhunzawma zawhfel tur a ni ang.

Ruihhlo Do Beihpui-Operation Jericho kalpui mek chungchanga hmalak zel dan tur chu nimin khan Siaha-ah Home Minister K. Sapdanga hovin sawiho a ni a, Home Minister chuan Operation Jericho chu thalaite nunna chhan nan kalpui a nih thu a sawi.

Kumin December 6-9 chhung khian 'India International Science Festival (IISF) 2025' chu Chandigarh-ah neih a ni dawn a, India Meteorological Department, Aizawl buatsaihin nimin khan a khuhhawnna neih niin Larsap General (Dr) Vijay Kumar Singh chuan a hmanpui a ni.

Serchhip khawpui-a tui harsatna thleng mek ah Diesel Engine hmanga tui pump theih hun chu tihpun a ni a, Tuisem a ziaawm leh vat theihnan theihtawp an chhuah mek zel thu PHE Department hotute chuan an sawi.

Serchhip District Magistrate Paul L. Khuma chuan thupek tichhuakin Serchhip District chhung khawi hmunah mah dan lova kuhva lakluh leh phurh phal a ni lo tih a tarlang a. Hemi chungchanga Nov. 25, 2025-a thupek a tihchhuah ah Serchhip District chhung khaw hrang hrangah dan lova kuhva phur lirthei an kal thin tih hriat a nih thu leh Ser-chhip District chhungah dan phal loha kuhva phurh a lo tawp theih nan Section 163 of Bharatiya Nagarik Suraksha Sanhita, 2023-in thuneihna a pek angin Serchhip District chhung khawi hmunah mah dan lova kuhva lak luh leh phurh phal a ni lo tih a tarlang a. He thupek hi Nov. 25, 2025 atanga thla hnih (2) chhung huam tur niin thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.

PWD Serchhip Division chuan Serchhip-a khawpui chhung inkalpawhna kawng siamthat hna an tan leh mek a, hmun thenkhat ah chuan hna zawhfel a ni tawh bawk.

Nimin khan Chief Minister Lalduhoma hovin Core Committee on Thenzawl Peace City chu CM Conference Hall-ah thukhawmin Thenzawl Peace City huamchhunga Greenfield City proposal siam mek an thlirho a. He hunah hian UD&PA Secretary Lalmalsawma Pachuau chuan SASCI ah hian Urban Planning Reforms hnuaiah tinzawn bik nei (thematic)-a Greenfield City kalpui theihna component cheng vbc. 150 vel hmuh theihna a awm a, inelna (on challenge mode) atanga hmuh tur a ni tih a sawi a. Thenzawl Peace City huam-chhunga Tourism leh AH & Vety Department ram te behchhanin he Fund hmuh theihna tur Greenfield City proposal hi duan a nih thu a sawi a ni. He hunah hian Thenzawl Peace City Master Plan siam tura thlan IPE Global mithiamten Greenfield City proposal hi a lem nena entirin chipchiar takin an sawifiah a. An ruahmanna siam hi Core Committee hian pawmin Ministry of Housing & Urban Affairs ah thehluh a ni ang. Thenzawl Peace City Master Plan hi IPE Global ten chak takin an buaipui mek a ni.

National Institute of Technology (NIT) Mizo-ram Convocation vawi 9-na chu niminpiah khan Lengpui Community Hall-ah hman a ni a, IIT Guwahati Director, Prof. Devendra Jalihal chu khuallian a ni. NIT Mizoram Convocation vawi 9-na hi Board of Governors Chairman Harsha-vardhan Neotia leh Prof. S. Sundar, NIT Mizoram Director ten an kaihruai a. Report atanga a lan danin NIT Mizoram zirlai chhuak tharte atang hian za zela 97.1 laiin hna an hmu nghal a, zirlaite hi Company hriat hlawh tak takah te placement an hmu a ni. Heng bakah hian kum 2026 Graduating Batch atanga zirlai za zela 50 chuang chuan NVIDIA, Siemens, Schneider Electric, L&T, HSBC, Deloitte, BNP Paribas, Infosys leh Cubastion Company-ah te hna an hmu tawh a, Campus Recruitment Drive hi la kalpui mek zel a ni bawk.

Assam Rifles ten Civic Action Programme hnuaia ‘National Integration Tour’ an buatsaiha kal Siaha, Lawngtlai leh Lunglei atanga zirlaite chuan niminpiah khan Delhi thlengin President Droupadi Murmu chu Rashtrapati Bhavan-ah an kawm a, President chuan Mizo zirlaite chu taima tak leh rinawm taka awm tura fuihin, ram leh hnam tana thil pawimawh te vawng nunga, ram hmasawnna kawnga thawhpuiah a sawm a ni. He hunah hian Zirlaite chuan Tour-a an thil tawn leh an hun hman dante President hi an hrilh a, India ram-a Pisa sang leh zahawm taka President ngei an hmu thei chu lawmawm an tih thu an hrilh bawk a ni.

Mizoram State Agri, Horti, Forestry and Marketing Cooperative Federation Ltd (MAHFED Ltd) leh Bharatiya Beej Sahakari Samiti Ltd. (BBSSL) te chuan nimin khan Cooperation Minister, PC. Vanlalruata Pisa-ah thawhhona thuthlung (Memorandum of Understanding) an ziak a, MAH-FED aiawhin Managing Director H. Vanhlupuia leh BBSSL aiawhin Adviser DR. Omveer Singh ten hming an ziak a ni. BBSSL hi India rampum a thlai chi buaipuia rampawn thlenga thawn thin an niin anni hian thlai chi tha supply turin Cooperation Department kaltlangin Nodal Agency a thlan an nih angin MAHFED te nen hian an thawkho dawn a ni.

Zoram Poultry Development Society-te hmalakna in kumin September thla thleng khan Mizoram chhungah ar note 87,247 awp keu a ni tawh. Akashvani News Aizawl zawhna chhangin, Aizawl Ramrikawn-a Zoram Poultry Development Society a thawktute chuan Ar chi thum, Broiler, Rainbow Rooster leh Indbro Brown Layer tui te awp keu hna an thawh thin thu an sawi a, Rainbow Rooster chu pakhat Rs. 45/- zel-a pekchhuah a nih thin bakah Broiler note pawh Rs. 45/- atanga Rs. 55/- inkara an pekchhuah theih thu te, Indbo Brown Layer erawh Rs. 65/- a lei tur an kawl reng thu an sawi a, hei bakah hian District danga thawnchhuah a nihin motor thawnna man, a note pakhatah Rs. 3/- a nih thin thu an sawi bawk.

Nov. ni 29, 2025 (Inrinni) khian Madhya Pradesh-a Indore-ah Food4thought buatsaihin ‘Reading Decathlon’ neih a ni dawn a. Mizoram aiawh turin School pahnih Mount Carmel leh La Montessori te chu Mizoram Youth Commission (MYC) kaltlanga thlan niin heng School atang hian zirlai pahnih ve ve- Rebek Malsawmzuali leh Krista Roluahpuia Khiangte (Mt. Carmel School) leh Malsawmhlui Pachuau leh Joshua Lalawm-puia (La Montessori School) te chu kal tura thlan an ni a, heng mite hi State Level Competion winner an ni. Mizoram aiawh tura thlanchhuah zirlaite hi nimin khan MYC Chairman Malsawm-zuala Ralte chuan MYC Conference Hall-ah kawmin fuihna thu a chah a, Mizoram atanga a tel hmasa ber an nih thu sawiin, theihtawp chhuah chunga lehkhabu chhiar thatna tarlang chhuaktu ni zel turin a fuih a ni.

School Education Minister Dr. Vanlalthlana chuan nimin khan Champhai District tlawhin DIET Champhai Hostel Building a hawn bakah Govt. Champhai High School Golden Jubilee lawmna hun a hmanpui nghal bawk.

India Danpui 8th Schedule-a Mizo tawng telh a nih theih nana hmalak dan tur chungchangah Mizo Language Development Board leh Hnampual zirlai hruaitute chu niminpiah khan an thukhawm. He thutkhawm hi 8th Schedule Study Group-a Convener Lalsangpuia chuan kaihruaiin 8th Schedule-a Mizo tawng dah tura hmalak tawhna te leh Hnam peng hrang hrangte nena inunauna tha kan neih a pawimawhzia tarlangin sawihona hun neih a ni bawk. He hunah hian Pachhunga University College Mizo Deptt. HoD Dr. H. Laldinmawia chuan Mizo tawng than chhoh zel dan te, hnambil tawng hrang hrang a ral mai loh nana hmalak a tulziate zirtirna a pe a, MZU Mizo Deptt. a HoD Dr. Zoramdinthara hnen atangin 8th Schedule chungchanga hmalak tawhna te leh zirchianna hrang hrangte ngaihthlak a ni bawk.

Siaha District chhunga Naoatla-I leh Naoatla-II khua chawmtu tur Ni zung chakna hmanga tuilakna (pump) chu nimin khan PHE Minister Prof. Lalnilawma chuan a hawng.

ZPM Party chuan Lalduhoma kaihhruai sawrkar-ah kuthnathawk te tharchhuah a pung nasa hle niin an sawi.

Mizoram State Project Monitoring Committee (MSPMC) chuan nimin khan Kolasib District-a Sawrkar hmalakna hrang hrang leh hmasawnna ruhrel thawh mekte a hmunah an enfiah.

PWD Minister Vanlalhlana chuan Sawrkarin Truck neitu leh khalhtute harsatna a hre reng tih sawiin, Mizoram-a inkalpawhna kawng te pawh siam mek a nih thu a sawi.

India ramin ama puala Danpui duan hman theih tura a pawm ni hriatrengna, 'Constitution Day - Samvidhan Diwas' chu nimin khan ramchhung hmun hrang hrangah hman a ni a, Gauhati High Court, Aizawl Bench-ah pawh he hi hi Larsap General (Dr) Vijay Kumar Singh-a hovin hman a ni.

Zoram Drivers’ Union (ZDU) chuan kumin atan ‘Fimkhurna Hapta’ an hmang leh tan ta a, Serchhip-ah pawh nimin zing khan he Hapta hawnna hi neih a ni a. Aizawl-ah chuan Transport Minister Vanlalhlana hovin he Hapta hawnna hun hi hman a ni bawk.

Serchhip-a PHE Department hotute chuan Tuikum lui atanga Tui an pump-na khawl chhia thlakna tur chu Vawiin hian Mizoram rawn thlenpui hman an beisei tih an sawi.

Mizoram State Legal Services Authority (MSLSA) leh Administrative Training Institute (ATI) tangkawp buatsaihin nimin khan Serchhip-ah ‘Special Awareness Campaign on Legal Provisions and matter for Government Officials of Mizoram’ neih a ni.

Serchhip South Zone Middle School Sports chu nimin khan Serchhip P&E Veng-a Leisekawt Mual-ah neih tan a ni a, tunkar Zirtawpni thleng a awh ang. Serchhip South Zone huamchhungah hian Middle School 7 awmin Sports Item hrang hrangah intihsiakna an nei dawn a ni.

November 23, 2025-a National Cadet Corps (NCC) Raising Day vawi 78-na denchhenin nimin khan Govt. Serchhip College-a NCC te chuan Serchhip District Hospital Blood Bank-a dah turin thisen Unit 12 an pe.

Mizoram Florist Association buatsaihin nimin khan Aijal Club Park-ah ‘MFA Winter Fair, 2025’ chu neih tan a ni a, December ni 3 thleng awh tur he Fair-ah hian Pangpar khawi chi 32 leh Pot 108 phochhuah a ni.

Mizoram Cooperative Apex Bank (MCAB) Branch 33-na ni turin ‘MCAB Vairengte Branch’ chu nimin khan MCAB Chairman Lalnunsanga chuan Vairengte-ah a hawng a, Vairengte SDO (Civil) H. Vanlalbiakzauva pawhin a hmanpui a ni.

Nimin khan KVK Kolasib chuan kuthnathawktu thlan bik te hnenah Alu chi an semchhuak a, heng Alu te hi Indian Council of Agricultural Research (ICAR), Central Potato Research Institute, Shillong, Meghalaya atanga hmuh niin variety chi thum- Kufri Pukraj, Kufri Chandramukhi, Kufri Thar te an ni. Alu chi dawng tur hi hi khaw 7- Phaisen, Bilkhawthlir, Buhchangphai, Thingdawl, Kawnpui Serlui zau leh Lungdai te atangin mi 20 thlanchhuah an ni a, heng mi 20 hnenah hian Alu chi quintals 10 leh natna laka veng theitu tur damdawi chi thum (3) semchhuah a ni.

State Adoption Resource Agency (SARA) chhinchhiah danin kum 2005 atanga kumin October thla thleng khan Mizoram-ah dan anga fa lak naupang 590 an awm a, an zinga a tam zawk 360 te chu India khua leh tui, ram chhung ami ten fa atana an lak a nih laiin, rampawn miin fa an lak naupang 64 an awm a ni. Kum 2017 atanga kumin October thla thleng khan naupang chhungte’n SARA kaltlangin naupang 145 te fa atan lain, Nuhrawn-Pahrawn kaltlanga fa atana lak naupang 2 an awm a, kum 2022 atanga Foster Adoption kaltlanga fa atana lak naupang 1 a awm bawk.

Lunglei District chhunga Bank hrang hrang te hnathawh dan thlirin nimin khan DC Conference Hall-ah District Consultative Committee (DCC), District Level Review Committee (DLRC) leh District Level Security Committee (DLSC) chu an thukhawm a, sawrkar kum kal mek Quarter hnihna tawp thlenga Lunglei District chhunga Bank Branch 23 te CD Ratio chu 69.95 niin Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Scheme (APY) hnuaia hmalakna hrang hrangte pawh he hunah hian thlirho a ni.

Mizoram People Forum (MPF) Governing Board Meeting chu nimin zing khan Aizawl-a Synod Committee Room No.1-ah neih a ni a, kum 2025-2026 chhunga MPF President atan Rev. John Raldosanga, Mizoram Presbyterian Church (MPC) chu thlan a nih bakah kum 2026-27 chhunga MPF General Headquarters Budget atan Rs.14,18,000 ruahman a ni bawk a, kumin chhunga MPF Office khar hun atan December 22,2025 leh kumthar-a Office hawn hun atan January 8, 2026 ruat a ni bawk. He thutkhawm ah hian MPF General Secretary Rev. Lalramliana hnen atangin report ngaihthlak a nih bakah Dampa Bial-a Assembly by-election neih zawh taka an hmalakna te thlirho a ni bawk.

Chief Minister Lalduhoma chuan Kuthnathawktute tanpui duhna thinlung pu, hlawhtlin ngei tum sumdawng (investor) te chu Mizoram sawrkarin lawm takin a thawhpuiin a dawngsawng thei reng tih a sawi.

Mizoram Bharat Scouts & Guides (MBS&G) in State Award a pek theih sang ber, Rajya Puraskar Award/Governor's Award chu nimin khan Larsap General (Dr) Vijay Kumar Singh chuan mi 149 te hnenah a hlan.

Sangha vawnthatna tur, ‘Cold Storage For Fisheries’ chu nimin khan Fisheries Department changtu Minister Lalthansanga chuan Ngaizel Kulikawn-ah a hawng.

School Education Minister Dr. Vanlalthlana chuan nimin khan Khawzawl tlawhin ‘Meet Your Minister’ hun a hmanpui bakah zirna In thenkhat leh District Education Officer (DEO) Office te a tlawh bawk.

Sawrkar laipuiin a nitin inhlawhfa chawpa eizawngte tana Dan a duan, Four Labour Laws chu Mizoram-ah pawh hman vat a nih theih nan Mizoram sawrkar a Labour, Employment Skill Development & Entrepreneurship Development hotuten hma an lak mek. LESDE Department hotute chuan Four Labour Laws chungchanga sawrkar laipui dan duan, Guidelines chu tunhnaia hriattir an nih chauh thu leh hemi atan hian inbuatsaihna an theih ang tawka an lo neih lawk tawh thu an sawi a, Mizoram sawrkar lo ruahman lawk dan leh sawrkar laipui Guidelines chu in hnerem tura chinfel vat a nih turtu leh hemi atan hian a hma thei ang berah thutkhawm an neih tur thu an sawi bawk a ni.

Mizoram tlawha rawn zin Union Minister of State, Agriculture & Farmers’ Welfare Ram Nath Thakur leh Mizoram Agriculture Minister PC. Vanlalruata te chu nizan hmasa khan inkawmin sawrkar hmalakna hrang hrang an sawidun.

Art & Culture Department Director Carol VLMS. Dawngkimi chuan Aizawl-a State Central Library chu mipuiten an hlutin, zirlai zingah tlawhtu an thahnem thin hle tih a sawi.

Serchhip District chhunga East Lungdar khaw dai-ah nizan hmasa khan bungraw phurtu Truck pakhat chu chesualin kawngthlang ah a tlanliam a, he Motor a chuang mi pahnih an boral.

Mizoram Upa Pawl (MUP) Serchhip chuan nimin khan hnatlang neiin Serchhip khawpui lunlai hmun hrang hrang thenfai hna an thawk.

Inrinni kalta (Nov. 22, 2025) zan atanga Salvation Army Thenzawl Corps Biak In-a Salvation Army Central South Division, Senior Young People (YP) Rally 2025 chu Pathianni zan khan a tiak a, Central South Division hian Aizawl Temple Corps atangin Chhim lamah Thenzawl thleng leh Chhak lamah Champhai thleng a huam a, Corps 34 awmin tun tumah hian Major Ngurthangvunga, Divisional Youth Secretary chu Speaker atan hman a ni.

Serchhip Power Sub-Division a Sub-Divisional Officer chuan Serchhip-a Village Council President te hnenah lehkha thawnin, Krismas vuakvet a Kawn/Veng chei nana Power Supply hman chungchangah Department hriatpuina leh phalna la mumal lova hmang an awm thin niin a sawi a. Hetiang atana Power Supply hmang tur chuan P&E Department-ah Temporary-a dil in emaw, Mimal In atanga an hmang/la a nih pawhin Energy Meter kaltlang ngeia lak tur a nih thu hriattirin a ngen nghal bawk a ni.

Assam State-a Dholai-ah nimin khan ‘Assam & Mizoram Border Festival 2025’ hman a ni a, Mizoram atangin Kolasib District leh Mamit District atangin mi thahnem tak telin Kolasib DC Robert C. Lalhmangaiha'n a ho a, Assam lam atangin Cachar MP Parimal Sukhlabaidya, Dholai MLA Nitar Ranjan Das te telin Cachar DC Mridul Yadav chuan a tawiawm bawk a ni.

Chief Minister Lalduhoma leh Union Railway Minister Ashwini Vaishnaw te chu nimin khan New Delhi-ah inkawmin Mizoram-a Rel Service mek tihchangtlun dan tur hrang hrang an sawidun a, Mizoram atanga Rel tlan dan thenkhat pawh tih danglam tum a ni.

Department of Personnel and Administrative Reforms (DP&AR) changtu Minister K. Sapdanga chuan mipuite tana awlsam nan leh rang zawka service pêkchhuah a nih theih nan District Administration-te chu Mini-Secretariat anga hnathawk (function) turin kalpui tum a nih thu a sawi.

Mizoram Pollution Control Board (MPCB) hnuaia Mizoram EIACP Hub buatsaihin nimin khan Govt. Aizawl College-ah ‘Green Skill Development Programme (GSDP) Training; Certificate Course in Waste Optimization Professional’ hawn a ni a, he training hi March 5, 2026 thleng awh tur niin MPCB Chairman Liankima Lailung IFS (Rtd.) chuan a hawng a ni. He training program-in a tum ber chu thalai lehkhathiam leh zirna chhunzawm thei lo te tân environment lam kaihhnawihah eizawnna tlâk thiamna bîk nei tura chherchhuah a ni a, he training-a tel tur hian Graduate mi 20 thlan chhuah an ni.

Aizawl Ramthar North-a cheng B. Mal-sawmtluanga (27) S/o B, Ramnunsanga chu nizan hmasa khan an tukverh atanga tlain dam-dawi In panpui a nih hnuah a boral. Thudawn danin B. Malsawmtluanga hian inkhel enin inkhel a en zo a mu tur chu a Room tukverh atangin a tla palh a ni. Amah hi Ramthar North Branch a Section YMA hruaitu nilai a ni.

Thla thar December 3-a Lai Autonomous District Council inthlanpui neih tura hman tur Vote thlakna khawl, EVM te endikna hmasa ber chu nimin khan Lawngtlai DC Conference Hall-ah neih a ni a, EVM Engineers, Bharat Electronics Limited, Bangalore atanga lo kal ten EVM hi enfiahin hman tura thlan te chu hman theih tura buaipui nghal a ni ang.

Transport Department chhinchhiah danin Aizawl District chhungah kumin hian lirthei registration thar 19,726 a tling tawh a, heng zingah hian lirthei ke hnih nei, Two Wheeler tam berin kumin chhunga Aizawl DTO-a Two Wheeler register zat chu 15,322 a tling tawh a, heng bakah hian lirthei ke hnih nei, man chawi a hman theih (Two Wheeler taxi) pawh kumin chhung hian 185 ziahluh a ni tawh bawk. Aizawl District Transport Office-ah hian kumin chhungin Car 2,829 ziahluh a ni tawh a, bungraw phur lirthei 916 leh man chawi-a mihring phur-a service thin lirthei 310 ziahluh a ni tawh bawk a ni.

New Delhi-a cham mek Chief Minister Lalduhoma leh DoNER Minister Jyotiraditya Scindia te chu nimin khan New Delhi-a Ministry of DoNER Office-ah an inkawm a, Chief Minister chuan DoNER hnuaia Empowered Inter-Ministerial Committee thutkhawm kumin August 19-a neih in a lo pawm tawh Pukzing - Silsury kawng leh Champhai - Tualpui kawng siamna tur bakah Mizoram chhunga Oil Palm Link Road siamna tur sum chu sanction thuai turin a ngen a. DoNER Minister chuan sum awmdan a zirin tun Financial Year-ah emaw Financial Year tharah pawisa hi sanction ngei an tum thu a lo hrilh a ni.

MNF Party Vice President leh Eptu Leader Lalchhandama Ralte chuan Chief Minister Lalduhoma chu Lunglei Press mite hmaa dawt tam tak sawiah puhin, Dictator tak-a rorel ah a puh bawk.

BJP Mizoram State chuan nimin khan Aizawl-a an Office-ah Karthar inhlanna leh Political Session neiin he hunah hian BJP Vice President JB. Rualchhinga chuan nakin-a kan la mamawh tur kan hnawl thin chu pawi a tih thu a sawi a. Dampa Bial-a by-election neih zawh takah BJP tana Campaign-a rawn kal Union Minister te hnenah mipui ten an mamawh hrang hrang an lo thlen thu sawiin, “Nimahsela, an mamawh pe theitu aiin, Opposition MLA ni tur bawk an thlang tling thung,” a ti a. “Nakina kan la mamawh tur tho kan hnawl thin hi a pawi hle a ni. Mizo mipuite hian kan inhriatchian a ngai tawh hle a, kan mamawh tak tak kan hriatchian hunah kan mamawh min pe thei te chu kan Vote chhuak ngeiin a rinawm a ni, LADC inthlanpui lo awm turah pawh Central Sawrkar neitu party, kan mamawh te min pe thei tur kan thlanchhuah a ngai takzet a ni,” a ti bawk.

ZPM Vice President C. Lalnunnema chuan dawt hmanga inbeihna a la awm reng mai chu a khamawm ta hle tih a sawi.

Union Minister of State for Agriculture and Farmers' Welfare, Ram Nath Thakur chuan 'Poorvottar Sampark Setu Programme ' hnuaia hnathawh hrang hrangte enfiah turin nimin Mizoram a rawn thleng a, Siaha District tlawhin sawrkar mi pawimawh ten an lo dawngsawng a ni.

Kumin chhungin Mizoram-ah COVID-19 hri kai 40 hmuhchhuah awmin nunna chan erawh an awm lo a, kumin hian September 16 hnu lamah hri kai hmuhchhuah erawh an awm tawh lo a ni.

Mizoram-a rawn kal Union Minister of State for Agriculture and Farmers' Welfare, Shri Ram Nath Thakur chuan nimin khan Siaha-a Krishi Vigyan Kendra (KVK) tlawhin 'Poorvottar Sampark Settu Programme ' hnuaia hnathawh hrang hrangte a enfiah.

 

Serchhip Area Baptist Council (SABC) Inkhawmpui chuan Serchhip-ah ruihhlo ngai te enkawlna hmun siam turin BCM Assembly-ah thlen nise an ti.

Mi 128 tan theihna tura ruahman Serchhip District Jail-ah Inrinni, Nov. 22, 2025 thleng khan Jail tang mi 78 an awm mek a, heng te hi mipa 68 leh hmeichhia 9 bakah nu te an tan avanga tang ve naupang pakhat te an ni. Serchhip District Jail-a tang mek zinga mipa 40 leh hmeichhia 3 te chu thiamloh chang tawh te niin mipa 28 leh hmeichhia 6 chu thubuai ngaihtuah lai an ni.

Tunhnaia Mizoram chhung Siaha leh Lawng-tlai District chhung khaw \henkhat a Tuihri (Cholera) leng chuan ziaawm lam a pan zel niin a lang a, he hri leng avanga mi 9 thi bak thih belh awm lovin ramri-a inkalpawhna erawh khauh taka la khar chhunzawm a ni thung.

Mizoram chhungah Myanmar leh Bangladesh atanga raltlan rawn lut mi 33,171 leh Manipur atanga raltlan mi 6,953 an awm mek nia hriat a ni a, Myanmar atanga Mizoram-a raltlan rawn lut te kutzia leh mitnaute thla lak (Biometric Enrolment) hna thawh mekah za zela 60 dawn zawhfel a ni tawh bawk.

Khawpui retheihna ti ziaawm tura sawrkar laipui hmalakna, DAY-NULM kalpui mekah Mizoram hmun hrang hrangah kawngsir-a thil zuara eizawnna siam sak mi 3080 an awm mek a, heng zinga a tam ber 90% chuang chu hmeichhia an ni.

Lunglei-a District Level Committee on Fixation of Prices of Meats, Vegetables and Fruits chuan Mizoram Market (Regulation and Facilitation) Act, 2022 tlawhchhanin Lunglei Municipal Council huamchhungah Vawksa man chu kg 1-ah Rs. 450/- ni turin an bithliah thar.

Tlabung-a Forest Department leh 152 Bn. BSF te chuan Khawthlangtuipui-ah kumin April thla hnu lamah dan lova Bangladesh-a tawlh tur nia hriat Teak thing Tum 1779 zet an man tawh a, heng an thing man an lilamna atang hian Rs. 23,28,300 hmuh a ni tawh bawk.

Siaha-a Maraland Gospel Centenary Hospital chuan Inrinni khan an damdawi In kum 20 tlin lawmna neiin Bialtu MLA, Dr. K. Beichhua chuan a hmanpui a, he damdawi In bultantu zingah a tel thu sawiin, an hmasawnna chu lawmawm a tih thu a sawi bawk. MGCH hi kum 2005-ah din niin thawktu Doctor 9 nen mi 92 an awm mek a ni.

Social Welfare Department hotute chuan an Department hnuaia rualbanlote tana hamthatna awmte mi tam zawkin an dawn theih nan Unique Disability Identification (UDID) siamtir kawngah nasa zawka tan la turin rualbanlote leh an chhungte an ngen. Social Welfare Department tarlan danin, UDID ti tur hian pianphunga rualban lo, Disability Certificate la nei lo te chuan District Hospital-ah form lain Disability Certificate lak tur a ni a. Disability Certificate an neih hnuah District Hospital hotute’n online-a ID Card siam sak tura ruahmanna siamin, Disability Certificate lakna atan hian Passport Size photo pahnih leh Aadhaar Card, Voter ID, Ration Card emaw, address tichiang tur document dang emaw eng pawh ken tel tur a ni. Hemi kawnga harsatna nei leh zawhfiah duh nei tan Ph. No. 7630073985 leh 6009672677-ah te hian zawhfiah theih reng a nih thu an sawi a ni.

Mizoram Pharmacist Association chuan Zirtawpni khan Aizawl-a Saizahawla Arcade-ah Annual General Conference an hmang a, Controlling and Licensing Authority F. Lalliantluanga chuan khuallian nia hmanpuiin tunlai khawvelah Pharmacist te pawimawhna a lan telh telh thu a sawi a, Drug & Cosmetics Acts and Rules, 1940 & 1945 leh Pharmacy Act, 1948 in a sawi ang ngeiin Pharmacist te chauhvin Dan ang thlapin damdawi an dispense theih thu a sawi a, hei hi Pharmacy chinah chuan a taka kalpui tum mek a nih thu a sawi bawk. He hunah hian an member boral mi 8 te sunna hun hmangin rorelna hun an hman bakah hruaitu an thlang nghal bawk.

SASCI Part-XIII (Urban Planning Reforms) hnuaia Bawngkawn leh Durtlang Leitan inkar kawng chei hna thawh tur chu Inrinni zing khan UD&PA Department changtu Minister K. Sapdanga hovin en ho a ni a, Site Visit hi Bawngkawn Junction atanga tanin Durtlang Leitan thleng neih a ni a, Project Design siamtu Lalruatkima Hauhnar, Principal Architecture, SEeDS Architectural Consultancy Services chuan an design te a sawifiah bawk a ni. Cheng vbc. 15 senga he hna thawh turah hian ruahman dan chuan khualzin leh khawtual mite tana tlawh chakawm tak tur siam a ni dawn a, kawng thlang lam hmun hrang hrangah khawthlirna, hahchawlhna, open gym, naupang tualchaina leh inthiarna hmunte siam a ni dawn a, hnathawh tan atanga kum khat vela zawhfel theih beisei a ni.

School Education Minister Dr. Vanlalthlana chuan tun Session-a Third Term atangin Class V-VIII zirlaiten zawhna inang an chhang dawn tih sawiin, hei hian zirna ah danglamna a siam a beisei thu a sawi.

Sawrkar laipui chuan inhlawhfate tana Dan thar, Labour Code chu hmang turin Zirtawpni khan a puang a, ramchhunga Industry lian a hotute chuan lawmawm an tih thu an sawi a ni.

Farkawn Village Council leh Farkawn-a tlawmngai pawl hrang hrang bakah Conservation Mizoram te hmalakna a din, Champhai District chhung Farkawn khaw ram Lurh tlang-a ‘Lurhtlang Vavu Sanctuary’ chu Zirtawpni khan Champhai DFO Lalbiakchama chuan a hawng.

Mizoram leh Telengana te chuan Inrinni khan Sports hmasawnna tura thawhhona thuthlung an ziak.

Karleh Nilaini, December 3, 2025-a Lai Autotomous District Council (LADC) inthlan awm turah State Election Commission (SEC) ruahmanna hnuaiah thuneituten tluang takin inthlang tura inbuatsaihna an kalpui mek a, Political Party leh Candidate leh anmahni puitute pawhin theihtawp chhuahin vote an zawng mek.

Hachhek Bial Kuhva Chingtu Pawl (HBKCP) chuan kumin-a an Kuhva thar te hralh mekin tunah hian cheng nuai 5000 chuang man an hralh tawh a, kumin ah kuhva rah an hralhna a to ber tum a thlen thu an sawi bawk.

Zirtawpni khan Champhai District chhunga Saikhumphai Zawl (Tiau kam)-ah Vaimim seng runpui neih a ni a, helai hmunah hian kumin hian Vaimin quintal 2000 chuang thar theih beisei a ni.

 

Ni hnih (2) chhung awh Serchhip Town Inter-Departmental Sports 2025 chu nimin khan zawhfel niin he Sports kharna hun hi Serchhip Bawrhsap Paul L. Khuma chuan a hmanpui a ni.

Serchhip District Anti-Tobacco Squad te chuan kumin chhungin tum 24 fehchhuah nei tawhin Vaihlo leh a kaihhnawih hman khapna dan bawhchhia mi 124 zet an man tawh.

Baptist Church of Mizoram (BCM) hnuaia rorelna sang ber dawttu, Area Baptist Council (ABC) Inkhawmpui chu nizan atang khan ABC hrang hrangah neih niin naktuk Pathianni zan thleng a awh ang.

Mizoram sawrkar-a Power & Electricity Department in Sesawng khaw thlang-ah Tuirini lui khuapa Tuirini Hydel Project buaipui a tum mek ah mipui ngaihdan lakna leh he Project chungchang inhrilhchianna chu neih chhunzawm zel niin nimin zing khan Thingsulthliah VC-II huam-chhungah Vantlang Rorel inkhawm neih leh a ni a, he hunah hian ram neitute pawh kawmin mimal engemaw zat ngaihdan lak a ni bawk a, Vantlang Rorel Inkhawm chuan Tuirini lui khuah hi an remti a ni. Hemi hmalam hian Seling khuaah mipui ngaih-dan lakna hi neih a lo ni tawh bawk a, mipui ten tui khuah an lo remti tawh bawk a ni. He project hi New Development Bank, Shanghai atanga sum puk cheng vbc. 660 chuang hmanga thawh tur niin sum hman zàa 80 hi Central sawrkar rulh tur a nih bakah zàa 20 hi State rulh tur a ni ang.

Mizo Academy of Letters-in kum thum dana a hlan thin Academy Award (Posthumous) 2025 dawng turin Revd. Dr. Chuauthuama chu thlan a ni a, tun thla ni 28-a MAL Kum Tawp Intawh-khawm-ah he chawimawina hi hlan a ni ang.

BJP Mizoram chuan nimin khan Aizawl a an Office-ah 'Atmanirbhar Bharat, Self Reliant India' pualin inkhawm an nei a, he hunah hian an Vice President Vanupa Zathang, IPS (Retd) chuan hemi hmang hian thu a sawi a ni.

Akashvani Lunglei (AIR Lunglei tia hriat thin) in kum 30 a tlin lawmna chu nimin khan neih a ni a, he hun hi Akashvani Director leh Mizoram Cluster Head DR. Lalropuia chuan hmanpuiin mipui thinlungah Radio chuan hlut ala hlawh reng thu leh Akashvani thawktute chu tunlai khawvela hmasawnna hrang hrang hmang thiam a, Digital khawvela Social Media te chu hman tangkai thiam a pawimawh thu a sawi bawk. Akashvani Lunglei hi kum 1995 khan din niin tun dinhmunah Regular Staff 9 leh Technical Assistant 3 bakah Casual Asignee 49 an awm mek a ni.

Nimin Nov. 21, 2025 khan Odisha khawpui Bhubaneswar-ah ‘CSR & Sustainability Conclave 2025’ neih niin Health Minister Lalrinpuii chuan khual zahawm niin a hmanpui a, CSR kaltlangin PSU leh Private Company lian tam takin mipui hnenah development nasa tak an thlen tawh thu sawiin, CSR Fund hman tangkai kawngah State lian leh te, a bikin NE States te kan la inthlauh zia sawiin, Mizoram phei chu India ram zingah CSR Fund dawng tlem ber kan nih avangin kan la hnufualna, a bikin infrastructure, Health leh eizawnna Livelihood Sector-ah te Mizoram-ah lo lut turin he huna tel te chu a sawm a, State sawrkar chu zau taka a inhawn thu a sawi bawk.