Inhlawhfate tan Dan thar, Labour Code hmang dawn

Sawrkar laipui chuan inhlawhfate tana Dan thar, Labour Code chu hmang turin Zirtawpni khan a puang a, ramchhunga Industry lian a hotute chuan lawmawm an tih thu an sawi a ni.

Inhlawhfate tana dan thar, Labour Code hian kum tam tak lo hman tawh Labour Law hlui chu awlsam leh huapzo zawkin a rawn siam dawn a. Sawrkarin Labour Code thar hman tura a tihte hi Code on Wages, 2019; Industrial Relations Code, 2020; Code on Social Security, 2020 leh Occupational Safety, Health and Working Conditions Code, 2020 te an ni a. Union Labour and Employment Ministry chuan kum 10 kalta chhung khan Social Security huamchin a zau telh telh tih sawiin, kum 2015-ah hnathawk thei a huamchin hi zaa 19 anih laiin kum 2025-ah chuan zaa 64 a huam tawh tih a sawi a. Tuna Code thar pali hman nih hnu hian hmasawnna awm belh leh tura beisei niin Social Security hrang hrang an neih belh dawn bakah State leh Sector hrang hrangah hlawkna zau zawk a thlen dawn a ni, a ti.

Ramchhunga Industry liana hotute chuan sawrkarin Labour Code thar hman a rel chu lawmawm an tih thu an sawi a. Ramin a mamawh hun takah he Code hi hman a ni dawn tih sawiin, tunlai eibar zawnna kawngah thil pawimawh tak a nih thu an sawi bawk a. He Code thar hian hna thar siam kawngah leh Social Security lamah te zau zawkin a tuam dawn tih sawiin, awlsamna a thlen dawn niin an sawi a ni.