YMA hruaitu ten Vaihlo chungchang an zirho

Serchhip khawpui chhunga YMA Branch hrang hrangte tan Vaihlo leh a kaihhnawih, zuk leh hmuam chungchang zirhona chu nimin khan Serchhip Sub-Hqrs. YMA Hall-ah neih a ni.
Nimin-a 'Training on Tobacco Control for Sub-Hqrs. YMA Serchhip' neih hi Serchhip-a Sr. CMO Dr. LP. Malsawma chuan hmanpuiin vaihlo ah hian natna min thlen thei tam tak a awm thu leh a ngawl min vei tirtu thlenga a awm thu a sawi a. Hei vang hian Vaihlo leh a kaihhnawih te chu tih chhin loh a pawimawh thu a sawi a. Heng zuk leh hmuam kan tih te hian kan taksa tan kawng hrang hrangah harsatna a thlen theih dan te pawh sawiin, hei vang hian zuk leh hmuam laka kan inthiarfihlim zel a pawimawh thu a sawi bawk.

He hunah hian Sub-Hqrs. YMA Serchhip President, Kawlthuama pawhin hetianga Vaihlo leh a kaihhnawih dona kawnga NTCP ten YMA te an thawhpui chu lawmawm a tih thu sawiin, zuk leh hmuam dona kawngah pawh YMA Branch ten theihtawp an chhuah zel a pawimawh thu a sawi bawk.

Nimin-a he Training hi National Tobacco Control Programme (NTCP) Serchhip District-a DEO, Lalramnghaka Kawlni chuan kaihruaiin he Programme an buatsaih chhan tlangpui sawiin, YMA chu khawtlanga mipuite entawn leh mipuite kaihruaitu an nih avangin zuk leh hmuam khapna chungchangah pawh mipuite an zirtir theihna turin he hun hi buatsaih a nih thu a sawi a. He hunah hian Dr. Laldingngheti, ENT Surgeon te, K. Hming-thansangi, District Consultant NTCP te, Sarah Laldintluangi, Asst. Director, F&DA te, Maria VL. Neihhlui, Psychologist NTCP leh C. Lalrempuia, Social Worker NTCP ten Vaihlo leh a kaihhnawih khapna Dan leh thildang pawimawh te an zirtir a, sawihona leh zawhna leh chhanna hun te hman a nih bakah he huna tel te tan hian a thlawna ri hriatna that leh that loh enfiahna hun buatsaih a ni bawk.