Kan hnam zia chhawmnun zel a pawimawh thu sawi

Art and Culture Minister C. Lalsawivunga chuan Hnam upa leh fing apiangin mahni hnam tihphung leh kalhmang vawngin an roh thin tih sawiin, “Keini Mizote pawhin kan hnam zia hi kan rohin kan chhawmnung zel tur a ni,” a ti.

Art & Culture Department leh Mizo Cultural Artiste Association (MCAA) Sub-Headquarters Lunglei, Mizoram Independent School Association (MISA) Sub-Headquarters Lunglei leh Mizoram Teachers' Federation (MTF) District Headquarters Lunglei te tangtlang buatsaih ‘Folk Dance & Music Festival 2025’ chu nimin khan Lunglei-a C. Thuamluaia Mual-ah neih a ni a, he hun hi hmanpuii Art & Culture Minister C. Lalsawivunga chuan Mizote'n kan Mizona kan vawnnun zel a pawimawh tih a sawi a, Khawvel kalphungah mahni hnam zia leh chindan kalsan chu hnam ral zia a ni a, kan hriat loh karah ral lam kan pan tih hi kan hriat thar a pawimawh hle a ni, tiin Zirtirtute chu hun bik leh kut ni vang thla chauh lovah pawh zirlai naupangte thinlunga hnam rilru leh ziarang tuh a, hnam lam leh rimawi hrang hrang a tam thei ang ber zirtir a, an than hnan theih nan tan la zel turin a chah bawk.

He hunah hian Zai, rimawi, lam leh lemchan bakah hnam thuam, rimawi hmanrua leh hnam thil (bungrua) chi hrang hrangte nen hnam nunphung leh ziarang phochhuakin hun an hmang a ni.