Kumin a lirthei chesual vawi 91-ah mi 77 an thi

Kumin (2025) January thla atanga October thla tawp thleng khan Mizoram-ah lirtheia chetsualna lian tham vawi 91 thlengin mi 77 in nunna an chan.

Aizawl Traffic Police thuneitute hnen atanga Akashvani News Aizawl thudawn danin kumin-a thla 10 chhunga Mizoram-a lirtheia chetsualna thleng an chhinchhiah vawi 91 zinga 68-ah te chuan thihna thlengin mi 77-in nunna an chan a, midang 27 na takin an hliam a, mi 19 na vak lovin an hliam thung a ni. Kumin chhungin March thla kha lirtheia chetsualna liantham thlen tam ber thla niin chetsualna vawi 16 thlengah mi 16 an thi a, June thla-ah thleng tlem berin lirtheia chetsualna liantham vawi 4 thlengah mi 3 in nunna an chan a ni. AMC area-ah kumin hian lirtheia chetsualna liantham vawi 26 thlengah mi 13 an thi a ni.

Traffic hotute chuan Mizoram-a lirthei chetsualna thleng tam zawk chu a khalhtu fimkhur loh vang a nih thu sawiin, a khalhtu ruih vang leh lirthei khawl lam fel loh vang te chu zaa 10 vel ve ve a nih thu an sawi a. Mizoram chu tlangram a nih bakah kawng kawi tam tak a awm avangin mipuite chu fimkhur taka lirthei khalh turin an chah a, lirthei te tha taka enkawl thin tur leh vanduaina tawh palh pawha dan anga thiam an chan theihna turin lirthei document felfai taka enkawl turin an chah bawk a ni.

Hunpui (Krismas leh kumthar) denchhenin Aizawl Traffic Police chuan Aizawl khawpui chhungah ‘No Tolerance Drive/Checking’ an kalpui leh dawh tih pawh sawiin, an kalpui tan hun tur ngaihtuah mek a nih thu leh mipui hriat turin puanchhuah a la ni ang tih an sawi a. Aizawl Traffic Police hotute chuan lirthei khalhtu zawng zawngte chu dan zawm a, fimkhur taka lirthei khalh turin an hriattir tih an sawi a, lirthei document felfai tak nei tura lo inhmakhua theuh turin lirthei neitute an ngen tih a sawi bawk.