LADC-ah ZMP in Campaign hawnna an buatsaih

Lai Autonomous District Council (LADC) Inthlanpui neih tur atan ZPM Lai District Headquarters chuan nimin khan Campaign hawnna an nei a, Chief Minister Lalduhoma leh Minister thenkhat ten he hun hi an hmanpui a ni.

Lawngtlai Bazar Areopagi-a LADC MDC Election, 2025 Campaign kick off-ah hian Chief Minister Lalduhoma chuan kum 5 dang lo awm leh tur pawh Pathian leh mipuite zarah an sawrkar leh ngei an beisei thu sawiin, “Lai ram hian hmangaihtu dik a mamawh a, chumi atan chuan ZPM hian mi tha ni a kan hriat te kan rawn chhawp chhuak a ni,” a ti a. Sawrkarna an chan veleh ah kan ram rorelnaah Pathian ram a thlen theih nan hma an la nghal tih pawh sawiin, “Sawrkar hnathawkten hun an vawng dik nghal a, chhungril nun siamthatna hmangin kan hruaitu ten bul a ttn nghal a ni. Kan tum ber chu Moral Reformation a ni a, tuna kan candidate-te zingah Kohhrana hruaitu engemawzat kan nei te hian kan policy leh au hlate a hlawhtlin theih nan hma an lak ka ring a ni. Kan ram eichhetu eirukna a bo theih nan hma kan hruai a, kan facility dawn te nasa takin kan tihniam a. Kan hotuten hma hruaiin sawrkar hnathawkte pawhin an rawn zui nghal a ni,” a ti bawk.

He hunah hian Minister PC. Vanlalruata pawhin an sawrkar hnuah Mizoram tan thil tam tak an ti tawh tih sawiin, “Sawhthing kan lei ang kan ti a, a rate chhiat ber kumah pawh kuthnathawktute hnenah kg 1 Rs. 50-in kan lei a, chutiangin Hmunphiah te kan lei a, kum tharah pawh Sawhthing leh Hmunphiah a Grade siam lovin sawrkarin a lei dawn a ni,” a ti a. Minister Lalthansanga pawhin “LADC inthlan awm turah Nomination Committee-ten uluk takin candidtate an thlangchhuak a, heng ZPM candidte te hi kan ram hmasawn nan leh Lai ram hmasawn nan lo thlang tling turin mipuite ka sawm duh che u a ni,” a ti bawk.