Union Minister of State for Agriculture and Farmers' Welfare in Mizoram tlawhin hmalakna a enfiah

Union Minister of State for Agriculture and Farmers' Welfare, Ram Nath Thakur chuan 'Poorvottar Sampark Setu Programme ' hnuaia hnathawh hrang hrangte enfiah turin nimin Mizoram a rawn thleng a, Siaha District tlawhin sawrkar mi pawimawh ten an lo dawngsawng a ni.

Union Minister hi hian Helicopter hmanga Siaha hi thlengin Siaha Bawrhsap VL. Hruaizela Khiangte leh SP Manjeet Singh Sankhla bakah MADC CEM, M. Laikaw te chuan an lo dawngsawng a, MADC Complex-a Golden Jubilee Hall pan nghalin hetah hian Agriculture Department-ten Exhibition an buatsaih a tlawh nghal a ni.

Hemi hnu hian a ho hian Union Minister of State ho hian thutkhawm neih nghal a ni a, he hunah hian Union Minister Ram Nath Thakur chuan sawrkar mi leh Siaha mipuite chibai bukin, Prime Minister thupek anga lo kal a nih thu leh Siaha mipuiten harsatna an neih leh an mamawhte chu Prime Minister hnena a thlen tur thu a tarlang a. Lonei mite hmasawnna chu sawrkar laipui ngaihpawimawh ber a nih angin chak taka hmalak mek zel a nih thu a sawi bawk.

Union Minister of State chuan Loneitute chu thahnem ngai taka thawk turin a chah a. Sawrkar laipuiin tanpuina a pek thin leh Scheme hrang hrang a kalpuite tihlawhtlingtu nih tum turin a fuih a. Hmalam hunah pawh tanpuina pek zel a nih tur thu tarlangin, mamawh an neite ziaka thlen tura a chah bakah amah ngeiin Prime Minister leh Union Minister for Agriculture and Farmers' Welfare hnenah a pek tur thu a sawi bawk.

Nimin-a Union Minister hova thutkhawm hi Siaha Bawrhsap VL. Hruaizela Khiangte chuan kaihruaiin inlawmna thu a sawi a, Siaha District dinhmun tlangpui a tarlang nghal a. MADC-a CEM M. Laikaw chuan Siaha mipuite aiawha Union Minister chua chibai bukin, sawrkar laipuiin Autonomous District Council-te tanpuina a pek thin chu tangkai taka hman thin a nih thu a sawi a, khawsak harsa zawk ten an chhawr tangkai hle niin a sawi bawk a. Siaha mipuite tana tanpuina awm thei ang angah pawh thahnem ngai taka ngaihpui turin Union Minister chu ngen a. MADC dinhmun leh hnathawh dan tlangpui pawh CEM chuan a tarlang nghal bawk a ni.

He thutkhawm ah hian Mizoram sawrkar-a Agriculture Department chuan Sawrkar laipui hnuaia Scheme hrang hrang an kalpuite leh an thlen chin tean tarlang a, mamawh an neih hrang hrangte pawh Union Minister hnenah hian an thlen nghal a ni. Nimin-a Union Minister hova thutkhawm ah hian Siaha District-a Official te an tel tha hle a, Bawrhsap chuan lawmthu sawiin hun tawp a khar a ni.