India Danpui hmang tura pawmna ni 'Constitution Day - Samvidhan Diwas' hman a ni

India ramin ama puala Danpui duan hman theih tura a pawm ni hriatrengna, 'Constitution Day - Samvidhan Diwas' chu nimin khan ramchhung hmun hrang hrangah hman a ni a, Gauhati High Court, Aizawl Bench-ah pawh he hi hi Larsap General (Dr) Vijay Kumar Singh-a hovin hman a ni.

British laka India-in zalênna a hmuh khan India chuan ama pual Danpui (Constitution) siam tur Member 299 awmna, Constituent Assembly a din a. Ni 165 chhungin Constituent Assembly chu vawi 11 thukhawm hmanin Danpui an duante remkhawm leh siamrem hna thawk turin August 29, 1947 khan Drafting Committee chu Dr. B.R. Ambedkar, ‘Father of Indian Constitution’ tia koh bawk Chairman-na hnuaiah din a ni a. November 26, 1949-a Constituent Assembly thukhawm chuan India Danpui siam chu lungrual takin a pawm ta a. Hemi hnu January 26, 1950 khan India Danpui chu hman tan a lo ni ta a ni a ni.

India Danpui hman theih tura pawmna ni hriatrengna, 'Constitution Day - Samvidhan Diwas' lawmna ah hian Larsap General (Dr) Vijay Kumar Singh chuan November ni 29 chu India Danpui hman theih tura pawmna ni a nih mai piah lamah a hlutna, hmathlir tha tak leh tun hun thlenga a la pawimawh zia lantirna hun a nih thu sawiin, Kan ram Danpui kaihhruaina hnuaia tun hun thleng thei tura India zinkawng ropui a tih thu a sawi a, Gauhati High Court Aizawl Bench chuan Mizoram mipuite dikna leh chanvo humhim turin Danpui hnuaiah mawhphurhna pawimawh tak a neih thu a sawi bawk. Danpui nung leh mamawh dan a zir zela her danglam theih nei thei tura Dr. B.R Ambedkar kaihhruai Constituent Assembly hmalakna chhuanawm a tih thu Larsap chuan sawiin, “India hmalam hun tur thui tak ngaihtuah chungin kan zavai atana tha leh rualkhai taka min phuarkhawmtu - Dikna, Zalenna, Intluktlanna leh Inunauna min pe thei tur Danpui tha tak an siam chhuak a ni,” a ti bawk.

Larsap chuan Danpui chu mipui thlan rorelna inghahna bulpui a nih thu leh Court rorelna chu Danpui humhimtu a nih thu sawiin, India hmarchhak-a cheng hnam hrang hrangte'n dikna leh zalenna an neih theih nana Gauhati High Court sulhnu hrang hrangte fakawm a tih thu a sawi a. Mizorama khawtlang inlungrualna, inrintawkna leh thlamuang taka chenhona chu India Danpui thiltum ataka lantirna pawimawh tak a nih tih a sawi a, Mizo khawtlanga remna, inzahtawnna leh tanrualna chuan Preamble-a inunauna (freternity) zehtel a taka a lantir thu a sawi bawk a. Danpui chu a chhawrtu tur mipuite an hriatthiam chauha thil ti thei a nih thu a sawi bawk.

He hunah hian Gauhati High Court Judge, Justice Marli Vankung pawhin Fundamental Duties tha taka hlen chu mitin mawhphurhna a nih thu leh Fundamental Rights ang thoa pawi-mawh a nih thu he hunah hian sawiin, dikna leh chanvo lam chauh hriaa mawhphurhna lam ngaihthah chu felhlel a tih thu a sawi a. Kan chanvo leh dikna mai bakah mawhphurhna Danpui-in min pekte kan zawm that phawt chuan kan rama harsatna tam takte kan pumpelh theih dawn thu a sawi bawk.

Gauhati High Court Judge Justice Kaushik Goswami pawhin he hunah hian Preamble pawimawhna sawiin, Preamble kentel thil pali - Justice, Liberty, Equality leh Fraternity chu ziaka awm mai lova ataka kalpui a tul thu sawiin, kalkhawmte chu Dan hmanga tanpui ngai leh retheite chhanchhuah tuma tan la turin a chah a ni.

Nimin-a he hun hman ah hian District & Sessions Judge leh Law & Judicial Department-a thawktute leh Dan hremi te telin Vincent Lalrokima, Member Secretary, Mizoram Legal Services Authority chuan kalkhawmte lawmna thu sawiin, Preamble chhiarrual-a hun hman a ni bawk.