December 13 atangin Vawksa man thar hman turin rel

Serchhip khawpui chhunga Vawksa zuartu mi thenkhat ten vawksa kg. khat man Rs. 450/- a an tihsan hnuah December 13, 2025 hma zawng chuan Rs. 400/- a hralh tura tih a ni a, December 13 atang chuan Rs. 450/- ah tihsan a ni ang.
Serchhip khawpui chhunga vawksa man (rate) chungchang ngaihtuah hian nimin khan Serchhip DC Meeting Hall-ah District Level Committee (DLC) on Fixation of Price of Meat, Vegetables and Fruits chu an Chairman leh Bawrhsap Paul L. Khuma hovin an thukhawm a, thilman sang zel ngaihtuahin Vawksa man chu kumin December ni 13 atangin Serchhip khawpui(Town) chhungah kg. ah Rs. 450/- ni tawh se tiin an rel a. Hetihlai hian Veng thenkhatah Vawksa man hi kg. ah Rs. 400 atanga Rs. 450/- a tisang an awm tih hriat a nih thu pawh sawilan niin, Mimal emaw, pawlho in emaw Vawksa man an duhzat an bithliah chu The Mizoram Market (Regulation and Facilitation) Act, 2022 bawhchhiatna a nih avangin hrem theih an ni tih tarlan a ni a. December ni 13, 2025 hmalam zawngah chuan Serchhip khawpui chhunga Vawksa hi Rs. 400/- a la hralh nise an ti a ni.

District Level Committee (DLC) on Fixation of Price of Meat, Vegetables and Fruits-ah hian District Commerce & Industries Officer (DCIO) Lalchhanhimi chu Member Secretary a ni a. Sub-Divisional Officer (Sadar), Sub-Divisional Police Officer (SDPO), District Agriculture Officer, District AH&Vety Officer, District Horticulture Officer, District Fisheries Development Officer, Legal Metrology aiawh, Serchhip Town Joint VC Chairman, Serchhip District Consumer Union, Serchhip District Mizoram Merchant Association, Serchhip Market Association (Sazuar) leh Serchhip Market Chawhmeh Zuar Association te an tel bawk a ni.