Serchhip-ah Bank te hmalak dan thlirlet a ni

September 2025 thla tawp Quarter thlenga Serchhip District chhunga Bank hrang hrangte hmalakna leh hnathawh thilirletna chu nimin khan Serchhip DC Meeting Hall-ah neih a ni.
Nimin a District Level Committee thutkhawm hi District Bawrhsap Paul L. Khuma chuan kaihruaiin Lead Bank Manager Lalnghawrliana bakah Serchhip District chhunga Bank Branch hrang hrang Manager te leh Line Department aiawhte an tel a. He huna tarlan a nih danin Serchhip District ah hian State Bank of India (SBI), Mizo-ram Rural Bank (MRB), Mizoram Coperative Apex Bank (MCAB), Punjab National Bank (PNB), HDFC leh NEFSB ten Branch an nei mek a, Bank Branch 19 a awm a. Heng bank hrang hrang a mipuite sum dahluh (Deposit) tlingkhawm chu cheng nuai 57432.67 a ni a, loan an pekchhuah zat tlingkhawm chu cheng nuai 42285.30 a ni.

Report atanga a lan danin Serchhip District chhunga Bank hrang hrang 19-te deposit hmuh zat atanga mipuite hnena an puk tir (loan) zat Credit Deposit Ratio chu 73.63% niin hei hi Quarter hmasa iin 1.92% in a pung a. Quarter hmasa nena khaikhina CD ratio a tlahniam Bank Branch 9 an awm a ni.

Priority Sector bikah District chhunga Bank hrang hrang atanga loan puk mi 8621 an awm a, heng zinga mi 417 te hian an Loan lak an rul tha lo a. Loan chhia (Non Performing Assets) tlingkhawm hi cheng nuai 939.50 a ni. Bank te hi thlatin vawi khat tal Financial Literacy Campaign nei tura bituk an ni a. Bank Branch-te hian Campaign vawi 26 an nei hman a ni.