Assam & Mizoram Border Festival 2025 hman a ni

Assam State-a Dholai-ah nimin khan ‘Assam & Mizoram Border Festival 2025’ hman a ni a, Mizoram atangin Kolasib District leh Mamit District atangin mi thahnem tak telin Kolasib DC Robert C. Lalhmangaiha'n a ho a, Assam lam atangin Cachar MP Parimal Sukhlabaidya, Dholai MLA Nitar Ranjan Das te telin Cachar DC Mridul Yadav chuan a tawiawm bawk a ni.

He hunah hian Kolasib DC, Robert C. Lalhmangaiha chuan Mizoram leh Assam ten inlaichinna tha zawk an neih zel a tul a, State pahnih inkarah buaina a awm tur a ni lova, kum hnih thum liam ta a ramri a buaina ang kha a thlen tawh lohna turin theihtawp a hmalak tlan a ngai tih a sawi a. Cachar MP Parimal Sukhlabaidya pawhin State pahnih inkarah har-satna awm thin mahse a pawimawh ber chu ram khat an nihna chu a ni tih a sawi bawk.

Mizoram & Assam Border Festival-ah hian Cultural item chi hrang hrang buatsaih a ni a, Mizoram atangin Cultural Troupe pali an kal a, Football leh Volleyball khel tur infiammi kal bawkin Cachar lam atang pawhin Hnam lam chi hrang hrang entirin infiamna nen hun hman a ni.