Kumin ah COVID-19 hri kai mi 40 hmuh an ni tawh

Kumin chhungin Mizoram-ah COVID-19 hri kai 40 hmuhchhuah awmin nunna chan erawh an awm lo a, kumin hian September 16 hnu lamah hri kai hmuhchhuah erawh an awm tawh lo a ni.

Health & Family Welfare Department hnuaia Integrated Disease Surveillance Programme (IDSP) hnathawkte sawi danin kumin hian Covid-19 hri kai inringhlel sample endiktir engemawzat an awm a, Chung zingah chuan mi 40 chuan COVID-19 hri an kai tih hmuhchhuah a ni a, heng hri kai hmuhchhuah te hi hri kai tih langchhuak an awm meuh lova, na tak pawh an awm lem lo niin an sawi bawk. Kumin chhunga COVID-19 hri kai hmuhchhuah hnuhnung ber chu September ni 16 kha niin September ni 22-a enkawl dam a ni a, hemi hnu hian Mizoram-ah COVID-19 hri kai hmuh hi an awm belh tawh rih lo thung a ni.

Kum 2020-a COVID-19 hri kai leh kai lo endik a nih tan atanga tun thlengi Mizoram-ah sample 19,98,218 endik a ni tawh a, heng atang hian COVID-19 hri kai mi 2,39,675 hmuhchhuah a ni a, mi 2,38,941 te chu enkawl dam nin hri kai hmuhchhuah zinga mi 734 te chuan an thihpui a, hri kai zinga nunna chan te hi upa lam leh natna benvawn chi hrang hrang nei sa an ni tlangpui nia sawi a ni a. chhinchhiahna atanga a lan danin Mizoram-a COVID-19 hri kai thihpui hnuhnung ber chu June 22, 2023 kha niin hemi hnu hian thihpui an awm tawh lo a ni.