District Hospital a nau chunga thihna thleng ah zangnadawmna pe turin ti

Mizoram State Consumer Dispute Redressal Commission (State Consumer Court) chuan Serchhip District Hospital a nau chunga Pi Malsawmkimi, Tlangpui khua a mi a thih chungchangah Mizoram Sorkar chu zangnadawmna ₹52,20,800 pe turin a ti.
Kum 2021 khan Pi Malsawmkimi, Tlangpui khua chuan nau nei turin Serchhip District Hospital chu panin a inentir a. Ultrasound te tih a nih hnuah nau nei turin Serchhip damdawi inah hian admit a ni a. Admit a nih hnu hian damdawi hmangin nau vei chawp tir a ni a. Damdawi hmanga nau vei tir a nih ni hnihna zan dar 8:30 ah naute a thi sa in a hring a ni. Nau vei tir a nih hma hian naute leh a nu hi an tha vekin doctor chuan a ngai a, mahse naute hi thi saa a pian hnu lawkah thi put neiin a thi put chu a nasat tak avangin a hnu lawk zan dar 10:40-ah Pi Malsawmkimi pawh chu Post Partum Haemorrhage (PPH) avangin a thi ve leh ta a ni. Pi Malsawmkimi hian a hmain nau vawi 4 lai a lo chhiat tawhin neih pangngaiin nau pathum a nei tawh thung a ni.

Pi Malsawmkimi thih chungchangah hian a pasal Pu Zaithankima chuan felhlel a awm ni a ngaiin Gauhati High Court (Aizawl Bench) ah a zualko a. Gauhati High Court hian Pi Malsawmkimi Serchhip District Hospital in an enkawl danah hian felhlel awm ngei ni a a hriat avangin cheng nuaih nga (₹5 lakhs) a lo chawi tir tawh a. Chutih rualin zangna dawmna tam zawk phut a hmun danga an zualko duh a nih pawhin a phal sak a. Pu Zaithankima hian State Consumer Court-ah thubuai thehlutin a zualko leh ta a ni.

Date 20.11.2025