Home leh UD&PA Department hmalakna thlirlet

Home Department leh UD&PA Department hmalakna hrang hrangte thlirletna hun chu nimin khan Chief Minister Lalduhoma hovin Secretariat Conference Hall-ah neih a ni.

He thlirletna hunah hian Chief Minister chuan Review Meeting chu an dik lohna zawnna a ni lo tih sawiin, “Kalphung leh tihdan tha zawk kan neih theih nan te, hmasawnna hna chak zawka kan thawh theih nan te a inrawnkhawmna a ni. In ngaihdante tlang takin sawi ula, inpawh takin meeting nei ang u,” a ti a. Service Review Committee nei rang tura chahin hnathawk tlak lote chu Special Pension Scheme hmanga pension peka, hnathawk thei ngeite lak mai chu sawrkar duh dan a nih thu a sawi a, Office hunbi lo ngaipawimawh tur leh Officer te chu an hnuaia thawkte welfare lo ngaipawimawh reng turin a chah a ni.

He Meeting-ah hian Home Minister K. Sapdanga pawhin Chief Minister hmalakna ah lawmthu sawiin, Review Committee chuan thawktute a tiphurin thawhhona pawh a titha tih a sawi a. Chawhma lamah Home Department dinhmun leh hmalakna hrang hrangte sawiho niin chawhnu lamah UD&PA Department hmalakna te sawiho a ni bawk.

He huna tarlan a nih danin Mizoram-ah Central Force, Assam Rifles, Border Security Force, Central Reserve Police Force, Border Roads Organisation, Army Medical Corps, Army Recruiting Office leh CIJW School ten hna an thawk mek a, Indo - Myanmar ramri thui zawng chu km 510 angin Home Ministry chuan a chhinchhiah a. A dungah Mizoram Police Station 12 awm mekin Assam Rifles ten duty post engemaw zat an nei bawk a. Free Movement Regime hnuaiah Border Pass pek thin niin October ni 30, 2025 thleng khan Border Pass hi 21,238 pek ni tawhin Zokhawthar, Hnahlan leh Zochachhuah-ah te pass hi pekchhuah a ni a. Indo Myanmar ramri venhimna tha tak avangin Ruihhlo leh dan lova Kuva lakluh a tlahniam nasa hle tih pawh tarlangin, Border Haat din hna kalpui tan a nih dawn thu leh Ministry of Home Affairs duh danin Zote, Champhai District-ah Pilot Project kalpui phawt a ni dawn tih tarlan a ni.

Mizoram leh Bangladesh ramri thui zawng chu km 318 angin MHA chuan a chhinchhiah a, Mizoram Police Station 6 awmin BSF duty post engemaw zat a awm a, Manipur leh Mizoram inrina ah Police Outpost 8 awm mekin Assam nena ramri-ah Outpost 22 a awm a, Tripura State nena ramriah Police Outpost 6 a awm mek bawk.

ILP online portal tha zawk buatsaih mek a nih thu pawh he hunah hian tarlan a ni a, SASCI atangin Central Jail, Central Women Jail, District Jail - Lunglei, Siaha, Champhai, Kolasib, Serchhip, Mamit leh Saitual te sak an ni a. Saitual jail hi hawn theih a ni hnai a. Mizoram-a Jail tangte ei leh in atan thlatin cheng nuai 40 vel senral a ni.