Mizoram State University hmunpui Lunglei-ah dahin nakum-ah Engineering College Class tan tum a ni

Chief Minister Lalduhoma chuan Mizoram State University hmunpui tur chu Lunglei-ah dah tum a nih thu a sawi a. Lunglei Pukpui-a Mizoram Engineering College pawh nakum atanga Class tan thei tur a ruahman a nih thu a sawi bawk.

Nimin khan Lunglei High Powered Committee (HPC) chu an Chairman leh Chief Minister Lalduhoma hovin High Powered Committee Conference Hall, Lunglei-ah an thutkhawm a, he hunah hian Chief Minister chuan Lunglei mipuite duh em em Mizoram State University hmunpui tur chu Lunglei-a dah tum a nih thu sawiin, “Mizoram State University Bill, Assembly lama lo pass tawhah Aizawl-ah a hmunpui dah tura lo tih fel vek lo ni mah se, Lunglei leh chhim lam mipuiten Lunglei-ah awm se an duh tih kan hria a. Chuvang chuan, dan chu a tul anga siamthat (amend) leh mai pawh huamin Lunglei-ah a hmunpui dah hi kan tum ta a ni,” a ti.

Hemi hnu thuthar thehdarhtute a kawmna ah Chief Minister chuan Mizoram State University hmun tur ram chu a thlawna pek ngai tih sawiin, pe thei tur te lo dap turin HPC kutah dah a ni anga, kum 10 chhunga an in tifel thei anih chuan a lawmawm hle ang tih a sawi a. He University a thawk tur hian Post 71 siam tawh a nih thu leh tunah hian Post 21 fill-up phalna pek a nih tawh thu a sawi bawk.

Hetihrual hian Lunglei Pukpui-a Mizoram Engineering College pawh nakum atanga Class tan thei tur a ruahman a ni tih Chief Minister chuan sawiin, Post 63 siam tawh a ni a, a dang Post 21 siam leh a ni dawn tih a sawi a, a panna tur kawng sial nan cheng nuai 94.51 sanction fel tawh a nih thu leh ATL Road pawh tunah hian siam that tan anih thu leh pawisa pawh dah fel vek tawh a ni tih a sawi bawk.

Nimin-a HPC Lunglei thutkhawm ah hian Lunglei By-pass Road sialna tur hmalakna chu thlirho niin a bawhzui zel dan tur an rel a. Serkawn Bazar Shed sak thar thu te, Lunglei-a Cooperative Training Centre din te, Govt. Lunglei College tihhmasawnna tur te sawiho a nih bakah Mizoram chhim lamin Airport a neih ve theihna tura hmalaknate pawh sawiin, Chief Minister hian Mizoram chhim lam leh khaw chhak lama Airport siam belhna tur ram thlithlai mek a nih dan a sawifiah a ni. Heng bakah hian High Powered Committee kalphung tha zawk a awm theih nana thil pawimawh dangte relin, an thurel te bawhzui dan tur an ruahman a. HPC Vice Chairman V. Malsawmtluanga leh Member R. Lalrochama te pawhin thu an sawi bawk a ni.