Hlawhtlinna tak tak nei turin taimakna, dikna, rinawmna leh thiamna tak tak neih a pawimawh

Mizoram Larsap General (Dr) Vijay Kumar Singh chuan nimin khan ICFAI University, Mizoram Convocation vawi 13-na hmanpuiin hlawhtlinna tak tak nei turin taimakna, dikna, rinawmna leh thiamna tak tak neih a pawimawh thu a sawi.

Shri NJ Yasaswy Memorial Auditorium, ICFAI University Campus, Durtlang North, Aizawl-a ICFAI University, Mizoram Convocation-ah hian Larsap General (Dr) Vijay Kumar Singh chuan zirlai hlawhtlinna chang degree hlan zawng zawngte thinlung taka a lawmpui thu sawiin, Convocation chu zirlaite beih hram hramna, inpekna leh hlawhtlinna chan lawmna a nih thu leh zirlaite mai bakah nu leh pate leh zirtirtute tana hun hlimawm tak a nih thu a sawi a. Hlawhtlinna tak tak nei turin taimakna, dikna, rinawmna leh thiamna tak tak neih a pawimawh tih sawiin, hmalam hunah chona tam tak an la hmachhawn dawn avangin zirlaite chu lo inpuahchah lawka, degree dawn mai duh tawk lova thiamna tak tak neih tum zawk turin a fuih a. Sang tak thlen tum tur leh an tumte tihlawhtling thei tura umzui peih tura chahin, an hna dil leh thawh duhnaah tha taka mawhphurhna an hlenchhuah theih nana inzir nasa turin a chah bawk.

ICFAI University Mizoram Visitor ni bawk General (Dr) Vijay Kumar Singh chuan Mizorama zirna sang zawk leh industry kaihhnawih zirna tihhmasawn kawnga ICFAI University hmalakna fakawm a tih thu sawiin, tunhnaia English leh Management-a Ph.D programme kalpui tan a ni leh Doctoral programme tihlen zel an tum chu lawmawm a tih thu a sawi a. Heng bakah hian India ram hmasawn leh intodelh, Viksit Bharat @2047 puitlin thei turin thiamna leh hnathawh tur tinzawn Course kalpui kawngah ah tan la zel turin a chah a. Zirlaite chu hna thiam, thil thar tha zawk thlentu leh khua leh tui tha nih tum tura chahin, hlawhtlinna chu mahni hlawhtlinna mai bakah khawtlang tana tha thawh atangte pawhin teh a ni, a ti a. Mahni inrinhlelhna nei lo tura chahin, hlawhtlinna duhawm tak chang thei tura mahni inrintawkna leh inthununna nena hmalam pan zel tur turin a fuih bawk.

ICFAI University, Mizoram Convocation-ah hian Academic Discipline hrang hrang 15 (UG 5 leh PG 10) hnuaia zirna programme zofel zirlai 242 te degree hlan an ni a. Heng zinga 212 te hi Post-Graduate niin, Under-Graduate 30 an awm bawk a. Gold Medalist 12 te hnenah Larsap-in Medal leh Certificate a hlan a ni. Heng bakah hian mipui leh khawtlang tana rawngbawl kawnga an thawhhlawk avanga Honorary Doctorate Degree dawngtu mi pathum - Padma Shri Sangthankima, Dr. C. Dothanga IPS (Retd) leh Dr. Anil Kumar Joshi te hnenah Larsap-in Doctors of Letters (D.Litt. Honoris Causa) a hlan bawk a ni.

ICFAI University, Mizoram hi ICFAI Group hnuaiah kum 2006 khan din niin tun dinhmunah zirlai 466, Faculty Member 68 (regular 34 leh visiting 34) bakah Non-Teaching Staff 11 an awm mek a. PG-ah programme 12 leh UG-ah 6, avaiin programme 18 ah zirna an kalpui mek a ni.