India International Science Festival 2025 neih tur khuhhawnna Larsap hovin Aizawl-ah neih a ni

Kumin December 6-9 chhung khian 'India International Science Festival (IISF) 2025' chu Chandigarh-ah neih a ni dawn a, India Meteorological Department, Aizawl buatsaihin nimin khan a khuhhawnna neih niin Larsap General (Dr) Vijay Kumar Singh chuan a hmanpui a ni.

'Vigyann Se Samruddhi : For Aatmanirbhar Bharat' tih thupui hmanga 'India International Science Festival (IISF) 2025' neih tur khuhhawnna Meteorological Centre, Aizawl-a neih ah hian Larsap General (Dr) Vijay Kumar Singh chuan Science tihhmasawnna tur leh Science thiamna te tangkai zawka hmanga, ram intodelh 'Atmanirbhar Bharat' leh hmasawn 'Vikshit Bharat' ni thei tura hmalakna pawimawh tak, India International Science Festival neih a ni leh tur chu lawmawm a tih thu a sawi a. Science & Technology tihhmasawn kawnga Prime Minister Narendra Modi leh a changtu Minister Dr. Jitendra Singh te hmalakna chhuanawm a tih thu sawiin, tunah chuan India chu khaw awmdan tur hrilhlawk kawnga hmahruaitu leh ram tam takte ngaihchan a ni tih a sawi a. Mahni pual Satellite siamchhuah mai bakah a awmna tur Orbit-a dah thei kan ni chu chhuanawm a tih thu sawiin, India chu khawvel puma nikhata Starts-up tan thar ngah ber leh tun dinhmuna nei tam ber pahnihna a nih thu a sawi bawk.

Larsap chuan Science tel lova khawsak leh hmasawn tura hmalam pan a harsat thu pawh sawiin, zirlai kalkhawmte chu Science ngaihven zual deuh deuh tur leh ram tana thil thar tha zawk ngaihtuahchhuah tum turin a fuih bakah IISF atanga hlawkna hmuh tum turin a chah bawk a. IISF chu Kût mai ni lo, khawvel huap beihpui thlakna pawimawh tak - zirbingmi, zirlai, entrepreneur, thil thar thlen duhtu leh mipui nawlpuite hmun khata phuarkhawmtu a nih thu a sawi a. IISF 2025 chuan hmasawnna tha zawk siamin helam ngaihvenna thar Mizoram-ah rawn thlen se a duh thu a sawi a, India ram hmasawn, chak leh intodelh siam nana a tangkai ngei a beisei thu a sawi bawk.

He hunah hian Meteorological Centre, Aizawl-a Director & Head Sudheer Kumar Dwivedi chuan inlawmna thu sawiin, IMD hmalakna te a tarlang a. Larsap thurawn angin IMD, Aizawl in English leh Hindi bakah Mizo tawng ngeia Weather forecast an tarlan thu leh Air Quality Index (AQI) pawh an tarlan zel tawh thu a sawi bawk.

India International Science Festival (IISF) hi Prime Minister hmathlir bawhzuiin kum 2015 atang khan hman tan a ni a, Science pawimawhna leh hmasawn nana chhawr tangkai dan turte inzirtirna neih thin a ni a. India International Science Festival (IISF) tum 11-na hi December 6-9, 2025 chhung hian Chandigarh-ah neih tur a ni ang.