Tourism Minister in Goa CM leh Minister a kawm

Tourism Minister Lalnghinglova Hmar chuan niminpiah khan Goa Chief Minister Pramod Sawant leh Tourism Minister Rohan Khaunte te kawmin Tourism lam hmasawnna tura State pahnih thawhdun chungchang a sawipui bakah Goa-a Mizo leh Northeast mi chengte hamthatna turte a thlen bawk.

Tourism Minister Lalnghinglova Hmar chuan Goa Mizo Welfare survey atangin Goa-ah Mizo 1,500 dawn an awm tih Goa Chief Minister hi a hrilh a, Goa chu Mizoram mai bakah Northeast State dang thalai sing chuang tana eizawnna siamsaktu a ni chu lawmthu a sawi rualin, heng hnathawkte himna tur leh mamawh huna an koh theih tur Goa sawrkarin siam se tiin rawtna a thlen a. Goa Chief Minister chuan Mizoram Tourism Minister chu tha taka lo dawngsawngin, Tourism lama thawhhona chu a taka kalpui theih a nih tur thu a sawi a; Mizo leh hmarchhak atanga hnathawkten harsatna an tawha an biakpawh tur Chief Minister Office-ah ruat nghalin Mizoram Tourism Minister nen a inhmelhriattir a, Goa Mizo Welfare hruaitute nena inhmelhriattir zui turin a chah nghal bawk.

Niminpiah vek khan State pahnih Tourism Minister te hi inkawm bawkin Goa Tourism Minister Rohan Khaunte chuan Mizoram Tourism Minister Lalnghinglova Hmar hi lawm taka lo dawngsawngin thawhdun theihna an neihte chu zirchianga tihhlawhtlin ngei an tum tur thu a lo hrilh a. Hmalak chhunzawm dan turah State pahniha Tourism Department hotute lo indawr chhunzawm nise tiin an sawidun a a ni. He inkawmna ah hian State pahnih Tourism Minister te chuan Tourism hmasawn nana thawhdun theihna hrang hrang an sawidun a. Goa-in tourism atana Digital platform hrang hranga a neihah Mizoram-a tourism hmunhma leh event tarlan ve te, Tourism leh Hospitality lama exchange programme neih te, Tourism kaihhnawih Skill development lama thawhdunte bakah State pahnih tourism tihlar kawnga thawhdun chungchanga Mizoram Tourism Minister rawtna thlente an sawidun a ni. 

Lalnghinglova Hmar hian nizan hmasaa Goa Mizo Welfare buatsaih 'Zo Zan' a hmanpui a; Goa-a hnathawk Mizo thalaite taimakna fakin, mi State-a cheng an nih anga mawi taka awm tur leh Mizoram lama an chhungte ngaihsak thiam turin a chah a, an thawhchhuahte khawla chhungte tana tangkaia nun zir turin a chah bawk.