Lurhtlang Vavu Sanctuary hawn a ni

Farkawn Village Council leh Farkawn-a tlawmngai pawl hrang hrang bakah Conservation Mizoram te hmalakna a din, Champhai District chhung Farkawn khaw ram Lurh tlang-a ‘Lurhtlang Vavu Sanctuary’ chu Zirtawpni khan Champhai DFO Lalbiakchama chuan a hawng.

Vavu Sanctuary hawnna inkhawm Farkawn VCP Lawmzuala kaihhruai a neih ah hian Champhai DFO Lalbiakchama chuan Vavu pawimawhna te, Mizoram State Bird a nihna leh kan ram a an tlem tawh ziate sawiin, Community Sanctuary te siama humhalh a tul zia a sawi a, Farkawn khawtlang tangrualin a humhalhna tur an siam avangin lawmthu a sawi a, kan ram thing leh mau, ramngaw leh a chhunga cheng nungchate humhalhna kawnga hma la sauh sauh turin kalkhawm mipuite chu a sawm a ni.

Lurh tlang-ah hian Mizoram State Bird ‘Vavu’ hi an la awm nual nia hriat a niin kumin May - September inkara an chhinchhiah theih zat atanga a lan danin Vavu puitling 20 awmin a pa 8 leh a nu 12 bakah a note 8 an awm a, Sava tlem, mang mai hlauhawm a nih avangin ven uluk a ngai hle a ni. Lurhtlang Vavu Sanctuary hi Sanctuary Managing Committee ten mumal taka enkawl turin ruahmanna siam a nih bakah inkaihhruaina fel tk siam a ni a, he Sanctuary tlawh turte chuan Managing Committee hruaitute hriattir lawk hmasa thin turin mitin an ngen a ni.