Sawhthing leina man sawrkar in a pe kim tawh

Mizoram sawrkar chuan kuthnathawktute Sawhthing thar a leina man a pe kim tawh tih sawiin, ZPM Party chuan sawrkar in a lo intiam tawh ang ngeia Sawhthing a lei thu an sawi bawk.

Agriculture & Farmers Welfare Minister PC. Vanlalruata chuan, sawrkarin Sawhthing a leina man a pek kim tawh thu hi sawiin, kumin hian Mizoram sawrkarin kuthnathawktute Sawhthing thar kg. 3,38,35,182 (quintal 3,38,351.82) a lei thu leh Sawhthing leina atan cheng vbc. 137.72 sen a nih thu a sawi a, Mizoram District hrang hrang zingah Champhai District-ah Sawhthing lei tam berin quintal 82,268.41 lei a ni a, a dawttu Serchhip District-ah quintal 62,479.23 lei a ni a. Khawzawl District-ah quintal 56,108.17 leh Saitual District-ah quintal 47,546.81 lei a ni bawk a. Siaha District-ah Sawhthing hralh tlem berin quintal 2,922.22 an hralh a; Lawngtlai District (qtl 3,826.69)-in an dawt a. Heng bakah hian Lunglei District-ah quintal 32,941,62; Aizawl District-ah quintal 18,403.33; Hnahthial District-ah quintal 18,090.13; Kolasib District-ah quintal 3882.69 leh Mamit District-ah quintal 9882.52 te lei a ni bawk.

Agriculture Minister chuan Sawhthing lei chungchang ah hian dik lo deuh a awm nia hriatte endik a nih hnuah a dik takte chu Sawhthing man pekchhuah vek a ni tawh thu sawiin, dikhlel awm nia an hriatte chu Sawhthing man pek an nih loh thu a sawi a, “Sawisel duh nei tan chuan District Agriculture Marketing Committee (DCMA)-ah complaint theih a ni,” tiin complaint lut a awm chuan uluk taka zirchian a nih tur thu a sawi a ni. Hei bakah hian nakum 2026-ah pawh sawrkarin Sawhthingah support Price a pek leh ngei dawn thu sawiin, “Kg khat Rs. 50 aia tlawma an hralh a nih chuan Rs. 50 a tlin lohna zawng pek an ni ang. Support price pek tan hun tur erawh CM hoin kan la rêl dawn,” a ti bawk.

Nimin khan ZPM Party chuan thuchhuah siamin Chief Minister Lalduhoma kaihhruai ZPM sawrkarin a lo intiam tawh ang ngéiin, kuthna-thawktute tharchhuah Sawhthing chu Kg-ah Rs. 50-in a lei thu leh Sawrkar in Mizoram puma sawhthing a lei zawng zawng man mipui-a a pe kim vek thei chu thil chhinchhiah tlak leh kuthnathawktute tana beiseina êng a tling tih an sawi a. “Kum tharah pawh sawrkarin Sawhthing hi 'Price Support' a la pe chhunzawm zel dawn a. Kg. 1 cheng 50 aia hniama hralh te tân lungngaihna tur a awm lo nia Agriculture Minister-in a sawi te hian mipui tana ding reng sawrkar kan nei tih a tarlang a, a thlamuanthlak tak zet,” an ti a. “Sawrkarin dan leh thupek a kengkawh tha a, a rûka kuhva tawlhna a tlakhniam nasat avangin leilungfa kuhva chingtuten sum tam tak an lalut a. Tun dinhmunah Hachhek bial kuhva chingtute chuan cheng nuai 5,000 chuang an lalut tawh a, an lakluh belh zel bawk a ni,” an ti bawk.