Mizoram leh Telangana ten Sports-ah thawhhona ziak

Mizoram leh Telengana te chuan Inrinni khan Sports hmasawnna tura thawhhona thuthlung an ziak.

Hyderabad-a 'Telangana - North East Connect: A Techno-Cultural Festival' neih mekah Sports Minister Lalnghinglova Hmar chu Inrinni khan telin Telangana leh North East State-te Sports hmanga thlunzawm ngheh dan chungchang sawihona neih ah Panel-ah a tel a. He hunah hian Sports Minister Lalnghinglova Hmar chuan ‘Mizoram as a future sports powerhouse’ tih thupui hmanga thu sawiin, Mizoram chuan hmathlir neiin Sports a kalpui chho mek tih a sawi a, Football leh discipline thenkhata an hlawhtlin anga Olympic Sports danga hlawhtlin dan kawng an dap mek tih a sawi a. Mizoram Sports Minister chuan Emerging Mizoram Sports (EMS) kalpui a nih dan tur sawi chhuakin, State pum dâpa talent zawnchhuah hna an thawh dan turte leh chumi kawngah chuan Telengana nena infiammite intlawh-tawn, Coach inkalpawhtawn leh Telengana State in Sports hmunhma a neihte Mizoram infiammi ten man chawi loa training-na atana an hman theih dan turte rawtna a thlen a ni.

He hunah hian Mizoram leh Telengana hian Sports hmasawnna tura thawhhona thuthlung ziakin State pahnih sawrkar Official lamin an ziah hnuah Inrinni zan khan Telangana Governor Jishnu Dev Varma leh Lalnghinglova Hmar te hian an inhlan tawn a ni.

'Telangana - NE Connect' hi Raj Bhavan, Telangana leh Telangana Sawrkar tangkawpin an buatsaih a ni a; Sports bakah field hrang hrang - Music, Women Empowerment, Fine Art, Performing Art, Literature leh Film Festival-te awmin Telangana leh Northeast state te inthlun-zawm a thawhho dan tur ngaihtuah leh pholan a ni a. Infiammi langsar, Badminton tana sulsutu Telengana mi Pullela Gopichand bakah Mirabai Chanu leh Bhaichung Bhutia te pawh an tel a ni.