Lenchim khua kum 50 tlin lawmna hun hman a ni

Saitual District chhunga awm Lenchim khua chuan nimin khan an khaw kum 50 tlinna, Golden Jubilee an lawm a, Bialtu MLA leh Minister Prof. Lalnilawma chuan a hmanpui a ni.

Minister Prof. Lalnilawma hian Lenchim Golden Jubilee Lungphun hawngin, Golden Jubilee Souvenir a tlangzarh a, mipuite chu Golden Jubilee chibai bukin Lenchim chu rambuai laiin Tlungvel lamah sawikhawm a nih thu leh kum 1975 khan din thar leh a ni tih a sawi a, kum 50-na hmel an hmu thei chu lawmawm a tih thu a sawi bawk a. Lenchim khua chu khaw lian lo tak, a cheng mihring pawh tlem te ni mah se, kawng tam takah khaw dang aiin an lian zawk thei tih sawiin, Lenchim khaw mipuite chu zirna leh faina kawngah te, infiamna lamah te leh intodelhna kawngah te tan la zual sauh turin a fuih nghal a. Lenchim khua chuan hming a chher theih nan mipuite chu an ngaihtuahna seng tura fuih bawkin, ruahmanna tha tak an neih phawt chuan sawrkar lam atang pawha puih an inhuam reng thu a sawi bawk a ni.

Nimin-a Lenchim Golden Jubilee lawmna hi Golden Jubilee Committee Chairman C. Lalremtluanga chuan kaihruaiin khuallian bakah hian Major K. Biakthuama, Chairman, Lenchim Welfare leh C. Lalzamliana ten thu an sawi a, item chi hrang hrang entir a ni bawk.

Lenchim khua hi Saitual atanga chhim lam Tawi tlang bulthuta awm a ni a, Aizawl atangin km 87-a hla niin Saitual atang chuan km 16 chauha hla a ni. Tunah hian Phullen RD Block hnuaiah a awm mek a ni. Lenchim khua Golden Jubilee (1975-2025) lawmna leh haw runpui hi November ni 19 atanga ni 21 thleng hman tur a ni a, nimin khan Golden Jubilee lungphun hawnna leh Vantlang inkhawm neih niin Vawiin lam hian inthlahna leh Jubilee kharna hun hman a ni ang.