Saikhumphai-ah Vaimim seng runpui neih a ni

Zirtawpni khan Champhai District chhunga Saikhumphai Zawl (Tiau kam)-ah Vaimim seng runpui neih a ni a, helai hmunah hian kumin hian Vaimin quintal 2000 chuang thar theih beisei a ni.

Vaimim seng runpui hi Director of Agriculture and Farmers Welfare Department, Field Management Committee (FMC), Multipurpose Primary Agriculture Credit Society (MPAC) leh Vaphai VC buatsaiha neih niin Agriculture and Farmers Welfare Department Director R. Lalnunzira chuan he hun hi khuallian niin a hmanpui a, kan ram ah buh thar theihna a tlem thu sawiin, za zela pali (4%) vel bak buh thar theihna kan neih loh avangin buh thar tam lamah tan la turin kalkhawm te chu a fuih a, “Silchar kawng chhe hlek se pawisa ngah tak chunga ei tur neilo thei dinhmunah kan din avangin nasa lehzuala buh thar tam lamah hmasawn a tul,” a ti a. Buh mai bakah Fu leh thlai lamah pawh intodelh a tul thu sawiin, kuthnathawktute chu taima lehzuala tan la zel turin a chah a, Department lam chuan mi taima te chu a tanpui a hreh loh thu leh an inhawn reng dawn thu a sawi a ni.

Saikhuamphai-ah hian kum 2021 atang khan Vaimim hi ching tanin a tirah chuan Society anga hmalak a ni a, Vaimin in a ram a ngeih avang leh a hralhna lama buaina an neih loh avangin mimal in an ching ta ni. Kumin hian quintal 2000 chuang thar thei tura ngaih an niin mimal angin Vanlalfawna chuan ching hnem berin kumin hian Tin 1500 vel thar turin a inbeisei a. Vaimin hi a hmunah Tin khat 300 in an hralhchhuak a, ran chaw atan an hralh ber a ni.

Vaphai leh a chhehvel ah hian Vaimim bakah hmun thenkhat ah Nihawichi chin a ni a, Agriculture Department in Nihawichi tha NMEOOS Scheme atangin quintlal hnih leh a chanve pe tawhin, chin belh zel tumin tunah hian hmalak mek a ni a, Cooperation Department in MPACS Vaphai hnenah a hriak sawrna khawl pe tawhin tunah hian a hriak sawr theih in peihfel a ni tawh a ni.