Naoatla-I leh Naoatla-II khaw tuilakna hawn a ni

Siaha District chhunga Naoatla-I leh Naoatla-II khua chawmtu tur Ni zung chakna hmanga tuilakna (pump) chu nimin khan PHE Minister Prof. Lalnilawma chuan a hawng.

He tuilakna hawnna hun Naoatla Tourist Lodge-a neih ah PHE Minister Prof. Lalnilawma chuan Naoatla-I leh II-ten tui thianghlim tha tak an nei tur chu a lawmpui thu sawiin, khawtlang ah hmasawnna rah tha a chhuah ngei a beisei tih a sawi a. Tui pump khawl leh tuizem enkawl chu khawtlang kutah thui tak a innghat tih pawh sawiin, neitu thinlung pu turin a fuih bawk a. WATSAN Commitee thutkhawm hunah pawh tui Bill mumal tak siama, a thlawn a tui sem mai lo tura chahin, hei hian a chhiat palha siam that kawngah nghawng tha tak a nei ang tih a sawi bawk.

He hunah hian khual zahawm leh Bialtu MLA Dr. K. Beichhua pawhin hriselna turin tui a pawimawh thu leh tui thianghlim tha tak a awm tur chu lawmawm a tih thu a sawi a, thianghlimna kawngah hmasawnna a thlen ngei a beisei tih a sawi a. Neitu thinlung pu-a a enkawl kawnga theihtawp chhuah turin a chah nghal a ni.

Heng khua te chawmna atan hian kum 2006 khan Vawmtlunglui hnar chu gravity-a lak ni tawhin NABARD RIDF XXIX loan hmangin Vawmtlunglui hi a mawng lamah nizung chakna (Solar energy) hmanga pump tura ruahmanna siam leh a ni a. Hemi atan hian NABARD Loan Rs. 4,16,84,000/- leh State Matching Share Rs. 46,32,000/-, a vaiin Rs. 4,63,16,000/- hman a ni. He tui lakna atan hian Solar Plate 255 dah niin, Total Installed Power chu 150.45kWp a ni a. Submersible pump 100 HP Shakti pump dah a ni a, Stanby Submersible pump vuah a ni bawk. He tuilakna hi ni 20 chhung enchhin a ni a, mi 2926 tan tui 624 litre per minute haw tura duan a ni.