Kum 2021-a Serchhip damdawi In thihna thleng ah sawrkar chu zangnadawmna pe tura tih a ni

Mizoram State Consumer Dispute Redressal Commission (State Consumer Court) chuan kum 2021-a Serchhip District Hospital-a nau chunga Tlangpui khaw mi Malsawmkimi a thih chungchangah Mizoram Sawrkar chu zangnadawmna Rs. 52,20,800/- pe turin a ti.
State Consumer Dispute Redressal Commission thuchhuah tarlan danin, Tlangpui khuaa cheng Malsawmkimi hi kum 2021 khan nau nei turin Serchhip District Hospital-ah kalin a inentir a, Ultrasound te tih a nih hnuah nau nei turin Serchhip damdawi In-ah hian admit a ni a. Admit a nih hnu hian damdawi hmangin nau vei chawp tir a ni a. Damdawi hmanga nau vei tir a nih ni hnihna zan, December 3, 2021 zan dar 8:30-ah naute a thi sa in a hring a ni. Nau vei tir a nih hma hian naute leh a nu hi an tha vekin Doctor chuan a ngai a, mahse naute hi thi saa a pian hnu lawkah thi put neiin a thi put chu a nasat tak avangin a hnu lawk zan dar 10:40-ah Malsawmkimi pawh chu Post Partum Haemorrhage (PPH) avangin a thi ve leh ta a ni. Malsawmkimi hian a hmain nau vawi 4 lai a lo chhiat tawhin neih pangngaiin nau pathum a nei tawh thung a ni.

He thil thleng avang hian Social Media-ah Serchhip District Hospital chuan dem a hlawh nasa hle a. Mizoram Sawrkar pawhin Magisterial Equiry dinin Serchhip DC (District Magistrate) chu enfiah tir a ni a. Malsawmkimi hian nau vawi 4 lai a chhiat tawh avangin zaichhuah (Saesarean Section) an dil ni a sawi chu Hospital a thawktute lam hian an dil lo tiin an sawi a. He Hospital a nau lo nei tawh thenkhat sawi dan phei chuan Hospital Staff te hi damlo an enkawl dan chungchang ah an vin thei hle a niin an sawi bawk a. Magisterial Enquiry report hian Medical Expert Team in enfiah nise tia rawtna angin Aizawl Civil Hospital atangin he thihna ah hian tihsual emaw, felhlel emaw a awm em tih enfiah tir leh a ni a. Malsawmkimi hian vawi engemaw zat nau a lo chhiat tawh avang leh amah pawh kum 40 lai a nih tawh avangin engtik lai pawha nau zaichhuah theihna hmun pan tura tih awm tak a ni tih chu Medical Expert-te ngaihdan a nih thu an report ah hian a chuang a ni.

Malsawmkimi thih chungchangah hian a pasal Zaithankima chuan felhlel a awm ni a ngaiin Gauhati High Court (Aizawl Bench)-ah a zualko a. Gauhati High Court hian Serchhip District Hospital in Malsawmkimi an enkawl danah hian felhlel awm ngei ni a a hriat avangin cheng nuai nga (5 lakhs) a lo chawi tir tawh a. Chutih rualin zangnadawmna tam zawk phut a hmundanga an zualko duh a nih pawhin a phal sak a. Hemi ang hian Zaithankima hi State Consumer Court-ah thubuai thehlutin a zualko leh ta a ni. Hemi chungchang hi Mizoram State Consumer Dispute Redressal Commission (State Consumer Court) chuan a ngaihtuah hnuah he thihna chungchang ah hian Mizoram sawrkar chu zangnadawmna Rs. 52,20,800/- pe turin a ti leh ta tih nimin khan Mizoram State Consumer Dispute Redressal Commission chuan thuchhuah siamin a tarlang a ni.