Union Minister in Siaha-a KVK leh damdawi In a tlawh

Mizoram-a rawn kal Union Minister of State for Agriculture and Farmers' Welfare, Shri Ram Nath Thakur chuan nimin khan Siaha-a Krishi Vigyan Kendra (KVK) tlawhin 'Poorvottar Sampark Settu Programme ' hnuaia hnathawh hrang hrangte a enfiah.

Union Minister of State hi Siaha KVK-a Sr. Scientist & Head Dr. H Vanlalhmuliana leh a thawhpui ten lo dawngsawngin a lawmna hun hman a ni a, he hunah hian KVK dinhmun tlangpui leh hmalakna kal mek te tarlangin, Hnam Lam te entir a ni bawk. He hunah hian Union Minister Ram Nath Thakur chuan kalkhawmte hnena lawmthu sawiin, KVK, Siaha hnathawh leh hmalakna fakawm a tih thu a sawi a, theihtawp chhuah zel turin a chah a. Loneitute hamthatna tura thawktu an nihna hre reng tura chahin, an rawngbawlna tha taka hlen turin a fuih a ni. India ram chu lo neitu tamna a nih angin sawrkar laipui pawhin loneitute hamthatna a ngaipawimawh hle tih paw sawiin, an tan theihtawp a chhuah thin thu a sawi a. KVK hmasawnna zelna tura theihtawp a chhuah tur thu sawiin, 'Best Innovative Framers Award a sem bakah KVK ten Stall an buatsaih chu a en nghal bawk a ni.

Siaha tlawha kal Union Minister Ram Nath Thakur hian District Hospital, Siaha pawh tlawh nghalin District Medical Superintendent Dr. C. Lalrosanga leh a thawhpui ten an lo dawngsawng a ni.