DEAF Account zirhona nei

Nimin khan Aizawl DC Conference Hall-ah ‘Depositors Education and Awareness Fund’ (DEAF) chungchang zirhona neih a ni.

Tunhma chuan engemaw avanga Bank Account kum 10 chuang khawih chet tawh loh chu ‘Account thi’ tih thin a ni a. Chuta pawisa awm te chu RBI DEAF Account-ah lutin, chuta pawisa tlingkhawm chu RBI in Financial Literacy Campaign leh mipui te hnena Bank lam thil pawimawh inhrilhhriatna (awareness campaign) tur atan te hman thin a ni. Tunah erawh chuan sawrkar laipuiin account neitu Customer te hnenah ngei an pawisa hi a bo a bang awmlova a luh theih nan dan a siam thar ta a. Bank Account kum 10 chuang te khawih chet tawh loh (Account thi tawh emaw kan tih thin) a pawisa awm te chu a lakchhuah thei ta ni.

Nimin-a zirhona ah hian Aizawl District a Lead District Manager Lalramchhani Ralte chuan Aizawl District chhunga Bank hrang hranga DEAF Account a pawisa tlingkhawm cheng vbc. 9.25 a awm mek thu a tarlang a. Kum 10 chuang  Account khawih che tawh lo leh ngaihsak tawh loh mi engemaw zat an awm a, a then phei chu an account-a nuai chuang nei an awm nual thu a sawilang bawk a. Account kum 10 chuang khawih chet tawh loh nei te chuan an Account neihna Bank-ah Document pawimawh te kenga kal mai tur a nih thu tarlan a ni bawk.