Sawrkar hnathawk in Dan zir

Mizoram State Legal Services Authority (MSLSA) leh Administrative Training Institute (ATI) tangkawp buatsaihin nimin khan Serchhip-ah ‘Special Awareness Campaign on Legal Provisions and matter for Government Officials of Mizoram’ neih a ni.
Serchhip Bawrhsap Pisapui Hall-a Awareness Campaign neih hi Serchhip Bawrhsap Paul L. Khuma chuan hmanpuiin sawrkar hnathawk te tana intuaihriamna hun tha buatsaih a ni chu lawm-awm a tih thu sawiin, mi nawlpuiin kan hriat zen zen loh dan leh hrai inhrilhhriatna hun a nih thu a sawi a. “Dan hriatna hian inringtawk taka hna thawh theihna min pe a. Dan hmaah chuan hriatlohna hi chhuanlam tling a nih loh avangin kan hriatna kan tihzauh belh zel hi a tul takzet a ni,” tiin “Kan tih tur theuh hi tha takin ti ila Dan hi siam a ngai kher lo mai thei a, mahse bawhchhia an awm thin hi Dan siam chhan chu a ni,” a ti bawk.

He hun hi ATI Deputy Director (Admn) Lalbiakkimi chuan kaihruaiin Financial year kan hman mek chhung hian District tinah hetiang inzirtirna hun hi buatsaih tum a nih thu a sawi a, a hmasa ber atan Aizawl District-a buatsaih a nih hnuah a tum hnihna atan Serchhip-ah buatsaih a nih thu a sawi a. Dan hriat chu sawrkar hnathawk ten an awmna hmun theuha an mamawh a nih thu sawiin, “Dan hriatna kawngah hian tun aiin sang ila sawrkar sum sen tam tak hi a pumpelh theih a ni,” a ti a. Dan kan hriatna a inchen loh avangin intuaitharna neih hi tul nia hriain he hun hi buatsaih a nih thu a sawi bawk.

Awareness Campaign-ah hian Josangzeli Tlau, Civil Judge-cum-JMFC; Lalrosanga APP leh Lalrinhlua, Advocate ten thupui hrang hrang hmangin sawrkar Department hrang hrang atanga thawktu kalkhawmte chu zirtirna an pe a ni.