Union Agriculture Minister nen inkawm

Mizoram tlawha rawn zin Union Minister of State, Agriculture & Farmers’ Welfare Ram Nath Thakur leh Mizoram Agriculture Minister PC. Vanlalruata te chu nizan hmasa khan inkawmin sawrkar hmalakna hrang hrang an sawidun.

State Guest House-a an inkawmna ah hian Union Minister Ram Nath Thakur chuan Mizorama hmun thenkhat a tlawhnaa kuthnathawktute tih hmasawnna tura a thil ngaih pawimawhte tarlangin, Agriculture & Farmers' Welfare Department hnuaia Sawrkar laipui Scheme hrang hrang chak zawka kalpui a pawimawh thu a sawi a. Siaha District-a kuthnathawktute a tlawhna ah mi taima leh thawkrim tak takte a hmuh rualin hmasawnna nasa zawk an chan theihna turin an harsatna te sukiang turin Sawrkarin mawhphurhna pawimawh tak a nei tih a sawi a. Sawrkar laipui kaltlanga Agriculture Department hnuaia kuthnathawktute tana tanpuina awm ang angte chu a dawngtu tur ten a hun taka an dawn theih nan thawktute chu tan la lehzual turin a chah a. Mizoram chu leilung hausakna ngah tak State a nih avangin hmasawnna chak zawk a awm theih nan heng leilung hausakna te hi hman thiam a pawimawh thu a sawi bawk a ni.

Mizoram State Agriculture Minister PC. Vanlalruata chuan kuthna-thawktute dinhmun chawikan nana Sawrkai laipui atanga ruahmanna tha tak tak siam a ni thin chu lawmawm a tih thu a sawi a. Union Minister of State hnenah hian Tung leh Cocoa cultivation kalpuina turin Sawrkar laipuiah ruahmanna thehluh a nih tawh thu leh he ruahmanna hi kalpui vat a nih theih nan theihtawp chhuahpui turin a sawm bawk a ni.

He inkawmna hunah hian Land Resources, Soil & Water Conservation Department changtu Minister Lalthansanga pawh telin Agriculture & Farmers’ Welfare Department-a thawktute, Land Resources, Soil & Water Conservation, Irrigation & Water Resources, Horticulture leh KVK hotute pawh an tel a. Hnam Lam te entirin zanriah an kilho nghal bawk a ni.