Mizoram-a pi pu hmun hlui 81 chu State Protected Monument-ah puan a ni tawh

The Mizoram Ancient Monuments and Archaeological Sites & Remains Act 2001 tlawhchhanin Mizoram-a pi pu hmun hlui 81 chu State Protected Monument-ah puan a ni tawh.

Mizoram-a Indian National Trust for Art and Cultural Heritage (INTACH) Chapter pahnihna ni turin nimin khan INTACH Lunglei Chapter chu Art & Culture Minister C. Lalsawivunga chuan a hawng a, he hunah hian Art & Culture Minister chuan kum 1987-a din INTACH Mizoram Chapter zarah dan tha tak, ‘The Mizoram Ancient Monuments and Archaeological Sites & Remains Act 2001’ neih phah a nih thu leh he dan tlawhchhan hian pi pu hmunhlui 81 lai chu State Protected Monument-ah puan a nih tawh thu a sawi a. Lunglei District lamah pawh Zosapte leh Sapho sulhnu te, pi pute sulhnu hlu tak takte chu humhalh zinga a tel thu sawiin, INTACH hmalaknain Mizoram State Protected Monument pathum – Kawtchhuah Ropui (Vangchhia), Ralven Puk (Vangchhia) leh Lungphun Ropui (Lianpui) te chu National Importance-ah puan a nih tawh thu leh Sawrkar laipui Ministry of Culture hnuaia Archaeological Survey of India atangin a cheithat nan tanpuina thahnem tak dawn a nih tawh thu a sawi a, INTACH chu ram rohlu leh pawimawh te humhalhtu ber a nih avangin Mizoram sawrkar pawhin a ngaihhlut thu leh a dah pawimawh thu a sawi a, Aizawl Pisapui kangah pawh INTACH duh ang chiaha sak that hna thawh mek a nih thu te a sawi bawk.

Art & Culture Minister C. Lalsawivunga chuan Mizoram sawrkarin Mizo hnam tobul leh thlang tlak dan uluk zawka zir leh chhui chiang turin Chief Minister Lalduhoma kaihhruaina hnuaiah ‘Hnam Tobul Zawn Chhuah Committee’ a din thu leh nasa taka hmalak tum a nih thu a sawi a, INTACH Lunglei Chapter chu phungbawmah sawmin, sawrkar hmalaknaa tawiawm zel turin a ngen a. Lunglei District leh a piah chhim lam Mizoram chhunga Zo hnahthlak pi pute hmun pawimawh tak tak chu Lunglei Chapter chuan theihtawp chhuaha zawng chhuakin, Zoram mipui hriata phochhuak turin hma la se a duh thu a sawi a, Zoram chhim lama tlang hrang hrang lal leh hnamte uluk zawka zirchiang a, tu leh fate tan ziaka dah that a nih theih nan hma la turin a ngen bawk.