Serchhip-ah lirthei enfiah hna khauh takin kalpui tum

Thla thar December 1 atang khian Serchhip khawpui chhungah khauh taka lirthei endik hna thawh a ni dawn.
Hemi chungchanga Serchhip SP Gavit Gogna IPS in tunhnaia hriattirna a tihchhuah ah Hunpui Krismas leh Kumthar vuakveta lirthei avanga chhiatna (Accident) kan tawh loh nan lirthei khalhtu leh mipui te fimkhur thar leh zual deuh deuh turin a hriattir a, he hunpui vuakvet a lirthei khalhtute leh mipuite lirthei accident-laka kan him tlan theih nan Serchhip khawpui chhung bikah Dec. 1, 2025 (Thawhtanni) atangin Serchhip Traffic Police ten khawpui chhung hmun hrang hrangah khauh taka lirthei endik hna (Mobile Traffic Checking) an kalpui tan dawn tih tarlangin, lirthei khalhtu zawng zawngte chu dan zawm a, fimkhur taka lirthei khalh theuh tur leh lirthei document fello te pawhin lo tifel turin a hriattir a. Hemi chhunga dan bawhchhia te chu ngaihhnathiamna a awm dawn lo a ni tih a hriattir lawk bawk a ni.

Serchhip SP chuan Zurui chunga lirthei khalh chuan mahni leh midangte tan buaina lian tak a thlen thin avangin lirthei khalhtu reng reng rui chunga lirthei khalh lo turin ngen leh hriattir an nih thu a sawi bawk a. Rui chunga lirthei khalh man an awm chuan dan angin na takin an chungah hmalak a nih dawn thu leh MV Act, 2019 Section 185-in a tarlan angin Rs.10,000/-(singkhat) chawitir emaw, thla ruk (6) thleng lung In tantir emaw, a pahnih in emaw-a hrem theih an nih thu pawh a tarlang bawk a ni.