Zawhna inang-in zirna ah danglamna a siam beisei

School Education Minister Dr. Vanlalthlana chuan tun Session-a Third Term atangin Class V-VIII zirlaiten zawhna inang an chhang dawn tih sawiin, hei hian zirna ah danglamna a siam a beisei thu a sawi.

Inrinni khan Govt. Khawrihnim Primary School kum 100-na, Centenary lawmna hun Govt. Khawrihnim Primary School tual-a neih a hmanpuina ah he thu hi sawiin Education Minister Dr. Vanlalthlana chuan kan ram zirna in hma a sawn theih nan tun Session-a Third Term atangin zirlaiten zawhna inang an chhang dawn tih a sawi a, Govt., Deficit leh Adhoc Grant-in-aid School Class V-VIII zirlaiten zawhna inang hi an chhan dawn thu leh hei hian zirna ah danglamna a siam ang tih a beisei thu a sawi a ni. Education Minister chuan zirna lama tanlak a tul thu sawiin, “Khawtlang hruaitute, tlawmngai pawl te leh nu leh pate tanrual a ngai a, vengchhung an tanrual chuan MLA te pawhin an hawisan thei lova, sawrkar leh mipuite tanho a ngai a ni,” a ti. Social Media-in khawpui leh thingtlangte pawh min run nasah thu leh in awmtlei nan kan hman nasat thu pawh sawiin, Smartphone leh TV te khawih chin tawk neih a ngai tih a sawi a. “Nu leh pate hian hmasawnna thil chi hrang hrang kan neih hian mawhphurhna kan neih belh zel tih kan hriat a ngai a ni,” a ti a. Nu leh pate chu an fate thil zir ngaihvenpui tura chahin, Zirtirtute pawh thil thar hmuchhuaktu leh siamchhuaktu an ni a, Syllabus mila thil thar zirtir thei ni turin a chah bawk.

Govt. Khawrihnim Primary School hi kum 1901-a thingtlang a School enchhin pathum (3) zingah a tel a. Kum 1925 atangin chhum lo chat lova kalpui a ni a, Headmaster hmasa ber chu Chalsuakpuia a ni a, kumin hian zirlai 51 an awm mek a ni. He School kum 100 tlin lawmna ah hian School Education Department Director Angela Zothanpuii leh SCERT Director Caroline Zoramthangi bakah Samagra Shiksha State Project Director C.Lalthanzira te pawhin lawmpuina thu an sawi bawk a ni.