Mizoram Larsap in Mizoram in hmalam hun eng tak a nei tih a sawi

Mizoram Larsap General (Dr) Vijay Kumar Singh chuan Mizoram in hmalam hun eng tak a nei tih a sawi.

Sawrkar laipui Ministry of Information & Broadcasting buatsaiha Sawrkar Project hrang hrangte zirchiang tura Assam leh Mizoram tlawha rawn zin mi 13 telna, PIB Cochin Press Tour Team te chuan nimin khan Larsap General (Dr) Vijay Kumar Singh hi Raj Bhavan-ah an kawm a, he hunah hian Larsap chuan Mizoram chu State ralmuang, khawtlang nun mawi leh entawntlak, ziak leh chhiar thiam zaa za awmna leh ami chengte pawh taima tak tak an nih thu sawiin, mipui tam zawkte eizawnna Agriculture niin Industry lian nei lo mah se Mizoram in hmalam hun eng tak a nei tih a sawi a. Khualzin hipna lam, leichi tel lo thlai, Sawhthing, Aieng, Hmarcha, Ramhmul damdawi, Thlai rimtui, Mau leh adangah te hmasawn tura theihna nasa tak a neih thu a sawi a. Sawrkar laipui leh State Sawrkarin hmasawnna project pawimawh tak tak an siam mek zel tih sawiin, nakin lawkah chuan Mizoram-ah hmasawnna ruhrel tam zawk hmuh tur a awm dawn thu a sawi bawk.

Larsap chuan Kerela atanga lokal Press Tour member-te chu Mizoram State mawi leh nuam takah a lo lawm thu sawiin, an cham chhunga hun hlimawm tak hmang turin duhsakna a hlan a. Tunhnaia Mizorama hmasawnna Project kalpui tlangpuite tarlangin, KM 51.38 a thui Bairabi-Sairang New Railway Line hawn tak chu danglamna thlentu pawimawh tak a nih thu sawiin, hei hian hmuh theihin khualzin a hip a, inkalpawhna leh bungraw phurh a tih awlsam avangin zinna senso leh thilman pawh a tlakhniam phah tih a sawi a. He Railway hi Kaladan Multi-Modal Transit Transport Project (KMMTTP) nena thlunzawm tura ruahman a nih thu leh KM 200 chuang hmabak la awm pawh tluang taka zawhfel a beisei thu a sawi bawk.

Press Tour aiawha thusawitu Dhanya Sanal K, Director (M&C) PIB, Cochin chuan Press Tour neih chhan tlangpui tarlangin, Sawrkar laipui ngaihpawimawh India hmarchhak a Sawrkar hmalakna te zirchian mai bakah hmarchhak State-te hrechiang tura rawn tlawh an nih thu a sawi a. Press Tour Team-te hian an cham chhunga Mizoram an hmuh dante leh hmasawn zel tura pawimawh nia an hriatte Larsap an sawipui a. Traffic dan tha taka zawm a ni leh mipui khawsak phungte bakah hmeichhiate'n  khawtlanga hmun pawimawh tak an chang chu entawntlak an tih thu an sawi bawk.

PIB Cochin Press Tour Team-te hian November ni 26 khan Mizoram lo thlengin Sairang Railway Station leh Mizoram State Museum-te an tlawh a, niminpiah khan Thenzawl-a Golf Course & Resort, Breed Development & Conservation Centre for Mithun leh Ginger Farm-te an tlawh a. nimin khan 23 Assam Rifles HQ, Aizawl tlawhin Vawiin hian Kerela an pan ang.